Opposition thuahhniha awm lo turin hmar tlangdung ka sawm – Prof Lalnilawma

Opposition thuahhniha awm lo
turin hmar tlangdung ka sawm
– Prof Lalnilawma
Hmar tlangdung chuan opposition MLA an neih tawh avangin Sinlung Hills Council inthlanah chuan state-a sawrkar lai ngei nei ve tawh turin a duhsak a, opposition thuahhniha awm lo turin a sawm tih minister Prof Lalnilawma chuan a sawi.
Sinlung Hills Council (SHC) inthlanpui atana campaign Prof. Lalnilawma chuan, campaign-a hmar tlangdung khaw hrang hrang a fanna atanga a hmuh danah hmasawnna a tla rual lo hle nia a hriat thu sawiin, sawrkar hmasate hunlai khan he tlangdung hian ngaihthah a hlawh deuh nia a lan thu a sawi.
ZPM sawrkarin he tlangdungah hian hmasawnna tluantling thlentu nih an duh tih minister hian sawiin, “Sinlung Hills mipui tan sawkar hriatreng tlak leh thangthar zelte tan pawha hmasawnna rotling thlentu nih kan duh a. Tunah hian opposition MLA bial ni mah ula, mipui tana sawrkar hmalakna a kaltluan theih zawknan Council inthlanah chuan ruling biala awm ve tawh turin ka duhsak che u,” a ti.
Hun hmasa lama therhlo leh chaw dangral hmanga thlemna an lo tawh thinte chuan an rilru thianghlim tak a hruaikawi nasaa a hriat thu sawiin, he tlangdung hmasawnna tak tak tur ngaihtuah hleithei lo khawpa an thluak suksaka a awm chu pawi a tih thu a sawi.
ZPM chuan sem policy an zuar ve loa, thawhrimna leh hmasawnna tluantling an tum zawk tih Prof Lalnilawma hian sawiin, “Kuthnathawh kawnga in taimak zia ka hmuh hian ZPM policy – Bana Kaih hlawhtlinpui tlak leh khai chhuah tlak tlangdung in niin ka hria. In thalai, zirnaa tuihal tak tak leh talent nei tha tak tak hian hun tha pek an phu hlein ka hria a, opposition bial thuahhniha in awm lohna turin ZPM leh HPC hi hnehna sang tak lo pe turin ka sawm che u a ni,” a ti.