Organ Donation Day hmangKal thlak ngai an tam ber

State Organ & Tissue Transplant Organisation (SOTTO) Mizoram Directorate of Hospital & Medical Education chuan Thawhtanni khan Aizawlah ‘15th Indian Organ Donation Day’ an hmang.
Sawrkar laipui hnuaia transplant chungchanga thuneitu, National Organ & Tissue Transplant Organisation report danin, India ramah kal thlak ngai bikah kum khatah mi mi nuai 2.5 vel mamawhtu an awm laiin, mi 5000 bawr chauhin kal dawn tur an nei a; thin thlak ngai mi sing 5-ah mi 1500 vel chauhin a thlakna tur an hmu a; lung thlakna tur pawh kum khatah mi 5000-ah mi 200 aia tlemin an hmu tawk bawk tih sawi a ni.
Hmanpuitu Health & Family Welfare minister Lalrinpuii chuan he ni puala thupui thlan – “Nunna chhanna atan taksa peng pek beihpui thlak” tih chu Pathianin mihringte a siam ropui zia leh kan thih hnu thleng pawha theihna leh malsawmna a lo dah tam zia min hriattirtu ni se a duh tih a sawi a. India ramah organ thlak ngai mi tam tak awmin, Mizo zingah pawh mi engemawzat an awm a, nunna hial chan phah pawh an awm tih a sawi a ni.
Mamawhtute hnena taksa peng pek a ngaipawimawh tih Lalrinpuii hian sawiin, “Mizorama kalpui a nih ve theihnan health care facilities thuamchak tura hma lak a ni a. Sawrkar laipui nen tangdunin SOTTO Mizoram kaihhruaiin a bultanna atan Civil Hospital Aizawl-ah kal thlak theih ve tura bawhzui mek a ni a, India rama kal natna bika hmingthang Institute of Kidney Diseases and Research Centre Ahmedabad nen thawhdunna (MoU) buaipui mek a ni,” a ti.
Synod Hospital Durtlang nephrologist Dr Joseph Lalhmachhuana chuan taksa peng pek – organ donation pawimawhna a sawi a; NP-NCD state nodal officer Dr Catherine Lalmuanawmi’n non-communicable disease laka inven dan a sawi bakah organ petute leh dawngtute hnen atangin an tawnhriatte ngaihthlak a ni bawk.
SOTTO Mizoram hi Union Ministry of H&FW-a National Organ Transplantation Programme hnuaia chak zawk leh felfai zawka hma lak a nih theihnan state level-a din a ni.