Osasuna mualah Real tlawm tlat!

Nikum September ni 23 hnu lama La Liga away goal a thun leh vawi khatnaah Vinicius Junior chuan a team tlawm tur a chhan zo lo a, Osasuna-in an mikhual palian Real Madrid hi El Sadar stadium-ah 2-1-in an hneh a, nizan result tarlan hman lohah Barcelona-in an mikhual Levante laka point thum an hlawhchhuah theih chuan league table-a an hmahruaina an luahkir leh thei ang.
Real zin chhuak hian point ngaa hmahruai fal tumin bul tan bawk mah se first half minute 38-ah Ante Budimir penalty pet an chhuah a; Brazilian Vinicius chuan second half-ah an siphurh sut bawk mah se a game khelh hnuhnung palia a goal ngana khan damna a thlen zo lo a; hun tawp dawna Raul Garcia tihluh hmangin Real manager hna a chelh tawh game ruk chhunga a vawi khatna atan Alvaro Arbeloa chuan league-ah a team a tlawmpui ve ta nge nge!
First half-a goal awmchhun leh mualneitu team hmahruaina hringtu penalty kha Madrid goalkeeper Thibaut Courtois-a chawi niin, hnai set sawt atanga Budimir-a goal tur chu a kut khing khatin Belgian hian a dansak a, a hnuah Croatia forward hian goal ban a tauhper leh a; referee Alejandro Quintero Gonzalez chuan Budimir hi na derah puhin yellow card a pe zet a, mahse, pitchside monitor atanga thil thlen dan endika an sawiho hnuah Courtois chuan Osasuna striker ke a rahsak ngei tih hmuh a ni a, a hlawhchhuah penalty atangin Budimir chuan Courtois-a bawh lohna lamah a chhuihlut ta nge nge a ni.
First half chhungin Brazil forward Vinicius chu reh tlawk tlawk mah se second half minute 64-a Trent Alexander-Arnold luhtir a ni chuan mikhual game a siamtha sawt a; he England defender hian khelmual lehlam atangin Vinicius-a tan ball tha a vawrh phei lawng lawng a, mahse, Brazil forward goal tur hi dansak a ni hlauh.
Champions League lama mualneitu Benfica an hmachhawn tuma a vun rawng han vanga diriam tawk Vinicius hian minute 73-ah Federico Valverde chhawp sak atangin an si phurh sutna goal a thun zui a tho a, thla nga dawn hnua away league goal a tihluh leh vawi khatna chiah a ni.
A hnuah Kylian Mbappe rawn chefuh ve leh dawn mah se offside flag avangin goal lawm tur a nei lo.
Last minute-ah heti ang deuh chiah hian Osasuna substitute Garcia chuan home team chakna goal tur khung mah se offside phar khum a ni a, mahse, video assistant referee (VAR) rawn a nih hnuah onside tih hmuh a ni a, Real tlawmna goal a ding tlang ta a ni!
Tun kha kum 2011 hnu lamah league-a Osasuna-in Real an hneh tum khatna niin, an kawtkaia an point thum hlawhchhuah hmang khan table-ah Pamplona club hian pakuana an luah chho.
El Sadar Stadium, Pamplona, Spain-a mipui 22,480 pungkhawm hmaa an tlawm hnuah Real manager Alvaro Arbeloa chuan tlarhma lama an bil tlat thu leh Nilaini Champions League return leg-a Benfica an mikhual hunah chuan insiamthatna tur tam tak an neih thu amah bawrtu reporter-ho a hrilh.