Oscar-ah ‘Golden’ a hlu
OSCAR 2026-ah REI AMI, EJAE, leh AUDREY NUNA an perform
KPop Demon Hunters soundtrack ‘Golden’ chuan 2026 Oscars-ah Best Original Song a dawng a, K-pop hla zinga Oscar dawng hmasa ber a nih bakah he award dawng tawh zinga hla phuahtu tam ber a nih bakah best song award dawng tawh zinga a phuahtu ten trophy an dawng vek loh vawi khatna a ni bawk.
He animated film a ‘Golden’ hla phuahtuah hian mi pasarih hming tarlan a ni a, EJAE (ani hi a film a Golden hla satu hmeichhe pathum zingah a tel nghe nghe), Mark Sonnenblick, Joong Gyu Kwak, Yu-an Lee, Hee Dong Nam, Jeong Hoon Seo leh Teddy Park te an ni. Tunhmain Oscar-ah original song dawngtu hi a phuahtu mi pali aia tam an la awm ngai lo.
KPop Demon Hunters film-a Golden hla satu HUNTR/X group a hmeichhe pathum zinga pakhat tana aw thawhtu EJAE chuan award dawn avanga lawmthu sawina neiin, “He award ropui tak avang hian Academy chungah kan lawm e. K-pop ka ngaithlak avanga min nuih thintute kara lo thang lian ka ni a, mahse, tunah chuan mi zawng zawngin kan hla an sa a Korean hlathu vek lehnghal. Ka inchhuang ve tawp. Ka hriatchhuah tak chu, he hla leh award hi hlawhtlinna lam a ni lo a, tawrhchhelna leh teireipeihna rah a ni. Kan team chungah lawmthu ka sawi a, ka nu leh pa leh ka unaupa leh ka pasal hual, ka manager te chungah lawmthu ka sawi e. KPop Demon Hunters cast dawhthei tak tak te chungah lawmthu ka sawi bawk. Maggie Kang leh Chris Appelhans (directors) leh kan producer Michelle Wang te chungah lawmthu ka sawi tak zet bawk e. He film avang hian kan lawm e. Netflix pawh kan lawm e. Sony Animation pawh kan lawm e,” a ti.
Motion Picture Academy hian dan khauh tak an neih chu he category-ah hian award trophy (an milim tê hi) pali chin bak pek theih a ni lo a, a hla phuahtu hi mi pali aia an tam chuan trophy pakhat an intawm ang tiin inremna an neih lawk a ngai a, Oscar winner tia hriat an ni ang reng tawh ang a, mahse, trophy erawh tar mawi tur an inchan kim dawn lo a ni.
‘Golden’ hian Oscar record dang pawh a siam a, Oscar-a best original song dawng zinga tun kum 20 chhunga Billboard Hot 100 (US singles) chart-a No.1 ni rei thei ber a ni a, he hla phuahtu mi pasarih zinga paruk chu South Korean an ni a, anni hi South Korean zinga he award dawng thei hmasa ber an ni nghal bawk.