Pahalgam-ah khualzin an hawi khawthawng leh tan

Pahalgam-ah khualzin an hawi khawthawng leh tan
Mi firfiakten mi 26 an thahna, Pahalgam-ah chuan ni nga a liam hnuah Kashmir Valley-a nipui mawina chhim tum mi an phusa leh tan a, mi tam takin zin an tum leh ta a. “A thleng zo tawh a, kal ka tum,” tih chu mi tam tak rilru a ni leh tawh.
A ram hmelhmang a mawi em avanga ‘Little Switzerland’ tia an koh hmunah hian Thawhlehni khan mi firfiakte na takin an che a. An chetna hmun lai bik, Baisaran erawh hawn a la ni lo.
Baisaran-ah hian khualzinte an fuankhawm laiin a bul lawka pine ramngaw leh a chhehvel atangin mi firfiakte hi chhuakin mi chu an kap a, khualzinte hiptu hmunah hian thisen tam tak a luang a ni.
A hma chuan heng lai hmun hi ni tin mi 5,000 atanga 7,000 velin an tlawh ziah a ni a, beihna a thlen hnuah erawh chuan mi 100 pawh an tling thei meuh lo va, hei hian tual chhung mi, khualzina innghata ei dap tam tak pawh a nghawng hman a ni.
Hetih mek lai hian Pathianni khan Pahalgam kawtthlerah chuan ram dang mi leh tual chhung khualzin hmuh tur an awm leh tan tawh a, a lan dan maiah chuan nunphung a pangngai leh tawh.
Khualzin tam tak chuan a tirah khan zin tih deuh mah se mi tam tak chuan hetiang thil hi chu hmun dangah pawh thleng thei reng a nih thu an sawi.
Maharashtra atanga a huhova tlawhtute chuan travel agent leh an thian dangte pawhin an hlau lem lo tih an sawi a. “Kan hlau tur a ni lo, thil thleng tur chu dan theih a ni lo, a thleng dawn tho,” tiin an zinga pakhat chuan a sawi.
Croatian leh Serbian khualzinte pawh Pahalgam kawtthlerah hian hmuh tur an awm a, an hmelah engmah thil tha lo thleng a awm tih a hriat loh.
Croatia atanga tlawhtu, Vlatko-a chuan, “Tun hi Kashmir ka vawi 10 tlawhna a ni a, ka tlawh apiangin nuam ka ti em em zel mai. Ka tan chuan khawvela number one a ni a, khualrel ang takin a awm a, a hahdam em em a ni. Kan thianho hian kan hlum a, thenkhat chu an vawi khat kalna a ni a, Croatian leh Serbian kan ni hlawm,” a ti.
A himna chungchangah pawh, “Kan him viauin ka hria, harsatna kan nei lem lo. Khawi hmunah pawh ‘hello’ kan inti tawn a, titna engmah a awm lo,” a ti.
Croatia atanga tlawhtu tho, Ljiljana-i pawhin news agency ANI hnenah ‘him hlea a inhriat thu’ a sawi a. “Engmah buai leh harsatna kan nei lo. Kashmir hi a mawi tak zet a, khuarel hi a nih ang takin a lang a, mipuite pawh an nun a mawi em em hlawm a ni,” a ti.
Pahalgam-a mi firfiakte an chet tuk maiah kha chuan tour agent tam tak chuan Kashmir tlawh tum hauh lawk tawh tam takin hlauh vangin an thulh leh tih an sawi hlawm a. Tunah erawh dan pangngai la ni pha lo mah se tlawhtu an awm leh tan a ni.