Pahalgam beihna phuba lak hi ka mawh – Rajnath Singh

Pahalgam-a mi firfiakten mi 26 an thah hnua India leh Pakistan inkar a chhiat mek karah Indian Defence Minister Rajnath Singh chuan India rilru tinatu laka chet ve chu a mawhphurhna a ni tih Pathianni khan a sawi.
Singh-a thu sawi hian India lakah Pakistan hi tharumin a che hnai nia ngaihna a awm nghal a. “Prime Minister Modi-a kaihhruaina hnuaiah hian in duh chu a thleng ngei ang tih ka tiam a ni,” tiin Delhi-a hun a hmannaah phuba an lak ngei tur thu hi a sawi a ni.
“Kan ram beitute hnena chhanna pek hi ka mawhphurhna a ni a. Prime Minister Modi-a hi in hre vek a, tih dan phung pangngai leh kal dan pangngaia thil ti mi a ni,” a ti.
A hmain Indian hruaitu lawk zingah Prime Minister Modi, Home Minister Amit Shah leh defence minister ngei pawh hian Pahalgam beihna chu na taka an chhan let tur thu an lo sawi tawh hlawm.
Pahalgam beihna a thlen hnu lawkah khan prime minister hian Indian Armed Forces hnenah ‘che chhuak turin zalenna’ a pe tih sorkar atanga thu dawn chuan a sawi.
India hian Modi-a sorkar hnuah kum 2016-a Uri beih a nih tum khan Balakot-ah surgical strike a lo ti tawh a, kum 2019-a Pulwama-a sipai beih chhan let nan Pakistan-in a puih firfiakte awmna hmun a kap tawh bawk.
Pahalgam beihna a thlen hnu lawkah khan Modi-a hian a beitu leh a puitute chu hriat chhuah an ni ang a, um zui an ni ang a, an beisei phak baka na hremna an hmuh tur thu a lo sawi tawh.
Indian lama sorkar hotu lian leh eptu hruaituten chhan let ngei a nih tur thu an sawi lai mek hian Pakistan-ah pawh venhimna tihkhauh a ni a, agency hrang leh leh sipaite an inralring a, sipaite chuan India hian a beih thut an ring reng.
Pahalgam-a Baisaran Valley-a beihna a thlen hnu lawkah khan Singh-a chuan India-in a titute lakah dikna hlen chhuah vek a nih tur thu a lo sawi tawh.
“A titute hi kan hre chhuakin kan hrem dawn mai a ni lo va, a phena lo awm leh India leilunga he thil rawng tak thlen theih nana hmala zawng zawngte pawh hremna kan pe vek ang,” tiin Singh-a chuan a sawi a ni.