Pahalgam beitute Pakistani ngei tih finfiah
India-a National Investigation Agency (NIA) chuan April 22-a Pahalgam-a mi 26 thattu mi firfiak zinga pathumte chu Pakistani an ni tih leh Lashkar-e-Taiba pawla mi an ni tih an finfiah tih an puang.
Anti-terror agency hian kha thil thleng an chhui mekna kal zelah ‘Mini Switzerland’ tia an sawi mai thin, Pahalgam-a Baisaran Valley-a pawi khawihtute hruai thlengtu mi pahnih pawh an man tawh tih an sawi.
“Batkote, Pahalgam-a mi, Parvaiz Ahmad Jothar leh Hill Park, Pahalgam-a mi, Bashir Ahmad Jothar te chu beihna thlentu firfiak pathumte nen kan an inhnimhnai hle a, Pakistani mi, LeT-a telte India-a luh theihnaah pawh an pui ngei a ni,” tiin NIA chuan a sawi.
“NIA-in a chhuinaah chuan Parvaiz leh Bashir te hian firfiak pathumte hi Hill Park-a seasonal dhok (hut)-ah an awmtir a. Ei tur, awmna leh chet velna tur an kawh hmuh a ni,” an ti.
Mi pahnihte hi Unlawful Activities (Prevention) Act Section 19 tlawhchhanin mi firfiakte India-a an awmtira an hum avangin man an ni a. NIA chuan an chhui zui mek zel bawk.
Tar lan tawh thin angin mi firfiakte hian Pahalgam-a Baisaran Valley-ah hian khualzin 25 leh Kashmiri pony ride operator chu an that a. Thil thleng hmutu leh thi chhungte sawi dan chuan an mi thahte hi an kah hlum hmain an sakhua an zawt zel a ni.
Pahalgam-a thil thleng hian India a tithinrim hle a. Chawlhkar hnih hnuah Operation Sindoor tia a hming vuahin Pakistan leh Pakistan-in a awp Kashmir-a mi firfiakte tawmna hrang hrangte chu a kap zui.
New Delhi chuan firfiakte awmna hmun chauh a bei niin a insawi a. Pakistan erawh chuan missile leh drone hmangin India khawthlang lam ramri hrulte kapin a bei let zui a. India air defence system-in heng thilte hi a tam zawk a lo dang chat thei a, ramri leh Line of Control hrulah thi erawh an awm phah nual thung.
Islamabad-in a beih let avang hian India hian Pakistan-a sipai hmunte a kap zui a. Air base eng emaw zat a tihchhiatsak a, ni li an inbeih hnuah inkahhai puangin an tawp zui a ni.
Get real time updates directly on you device, subscribe now.
Next Post