Pahnihnaah Barca tawlh chho

Sili fai tehrenga Nou Camp mikhual Getafe sawp chungin Barcelona chuan Inrinni zana chechhuak ve lo Girona lehpelin Spanish La Liga table-ah pahnihna an luah chho a, zanina an mikhual tur Rayo Vallecano an hneh chuan Girona-in an hum ngai pahnihna an luahkir leh thei ang.
Nizan inkhel result tarlan hman loh pakhatah hmahruaitu Real Madrid chuan Sevilla an mikhual a, an chak chuan defending champion Barca tan an title kawl lai humhim tura beiseina a tlem belhchhah leh sauh ang.
Inrinni zana Catalan team goal hmahruai kha minute 20 khelh tlin ruala Raphinha tihluh niin, second half tir lam leh laihawl thlen dawnah Joao Felix leh Frenkie de Jong-te’n an khung belh a; hun pekbelha Fermin Lopez goal khat thawh ve leh nen Xavi Hernandez-a team hian nuamsain an kawtkaiah hnehna an chang.
Barcelona hi Spanish La Liga game an khelh hnuhnung vawingaah vawili chakin, vawikhat draw an nei a, title race-ah beiseina chhete an la neih chhunzawm ve zel.