Pahnihnaah Juventus chho

Thawhlehni Serie A inkhelah Juventus chuan sikhat faia an mikhual Lecce hneh chungin table-ah pahnihna an luah chho a, point 13 neiin, hmahruaitu Inter Milan lakah point hnihin an hniam a, nizan result tarlan hman lohah Inter hian mikhual Sassuolo laka hnehna an chan chuan Juve nena an inkar hi an pawtzau thei ang.
Juventus chakna goal awmchhun hi second half tir lam minute 57-a Arkadiusz Milik tihluh niin, chak zo ta lo Lecce chuan point 11 nen palina an luah a, tun kha Serie A season kal laia an tlawm vawikhatna a ni.
Turin khaw inkhelah Lecce tlarhnung a phui tha viau a, mahse, an tlarhma luahtute’n hun pumin Juve goal zawnah ball an thawnlut zo lo!
First half chhunga Juventus tana goal thun teuh ber chu Federico Chiesa niin, angle zim tak atanga a khalh luh hnuah bete bawk lekin goal pawnah a thawnchhuak.
Hun pekbelh tir lamah Lecce player Mo-hamed Kaba chu tlukder case avangin a tum hnihna atan yellow card pek a ni a, hnawh-chhuah a ni.
Turin khaw club hi Inrinni liamta mai khan Sassuolo mualah 4-2 tehrengin an tlawm a, Thawhlehni Juventus Stadium inkhel first half-a an team khelin Juve supporters a tilawm lo a, goal awm loa half time an nghah thlen avangin an dawhtheihnain a tlin lo a ni ber!
Second half tir lamah mualneitu team an chefuh ta a, mahse, an kawtkaiah goal khat bak an khung zo lo.
Juve manager Massi-miliano Allegri chuan DAZN hnenah inkhel hautak a nih thu leh Lecce-in hun remchang an pe tam duh lo tih a sawi a, dawhthei taka khelin, an chance hmuh an chhawrtangkai niin a sawi a, hnehna an chang kha an tan a pawimawh tih a tarlang tel.
Kartawp Inrinni lea-gue match pakhatah Juventus hian Atalanta an luhkhung zui leh ang.