Pahnihnaah Liverpool an inhlangkai

English club hlun leh ropui Liverpool chuan an ropuina luah let leh tumin tan an khawh mek a, Pathianni zana an khingpui Fulham lakah 4-2 in an chak a, pahnihnaah an inhlangkai.
Liverpool hian Anfield-a an mikhual Fulham lakah khel tha thawkhat viau mah se goal erawh an thun thei mai bik lo. An kut zalah goal thun thei mai lo mah se minute 20-naah Fulham si nghak Bernd Leno own-goal hmangin hma an hruai hlauh thung. Chak tura rinkai ni zawk chunga goal an thun hmasak bawk si vangin Fulham tan Anfield-ah chak a harsa zui viau tura ngaih a ni.
Goal chhuah hmasa mah se Fulham an huaisen a, ngam takin an khingpuite an nawr let. Rin phak bakin Fulham hian mualneitu an nawr a, goal an thun ta mai bawk. Harry Wilson chuan goal an chhuah atanga minute li hnu lekah goal a thun a, an si phurh a sut. 1-1 a nih hnuin inkhel a hmuhnawm zui viau a, chawlhlawk hmain goal hnih a luh belh leh hman.t
Goal thun tuma tan khawh Reds tan hian Alexis Mac Allister chuan minute 38-naah hma an hruai nawn lehna goal a thun a, he goal hmang hian chawlhlawk hmain hma an hruai zui a rinawm hman viau tawh. Goal chhuah nawn leh mah se Fulham an hnual lova, an zam hek lo. Tha tho taka inlan chhnzawm Fulham tan hian Kenny Tete chuan minute 45’+3-ah goal thunin an si phurh a sut a, 2-2 a inhnehtawk chungin chawlhlawk an hmang ta nge nge.
Chawlhlawk hnu lamah inkhel a hmuhnawm chhunzawm viau a, goal a luh belh har viau bawk. Chak ngei tuma inlan Liverpool an khel a hmuhnawm a, an mikhualte an nawr zui nasa hle. An mikhualte nawr nasa viau mah se Reds hian goal an thun belh mai thei bik lo va, an chak zo lo mai ang tih a hlauhawm hman hle.
Goal a luh belh theih loh reng hnuin hun tawp dawn hnaihah Reds an che fuh a, inzawn zatin goal hnih an thun. Minute 87-naah Wataru Endo chuan hma an hruai nawn lehna goal a thun a. Minute 87-naah tunlaia chetha Trent Alexander-Arnold chuan an goal lina a thun zui leh bawk a, 4-2 a chakin, pahnihnaah an inhlangkai zui ta a ni.