Pak-a tang, hremna tuar zo tawh Indian 188-te chhuah turin ngen

India chuan Indian sangha mantu leh civil mi lung in tang 188, an hremna tuar zo tawhte chhuah leh hawtir thuai turin Pakistan a ngen niin external affairs ministry chuan a sawi.
Ministry thuchhuah chuan India leh Pakistan hian New Delhi leh Islamabad-a indawr tawnna kaltlangin civil mi leh sangha mantu an inmansakte hming an inthleng tawn a ni.
Kum 2008-a Agreement on Consular Access an siam hnuaiah ram pahnihte hian kum tin January 1 leh July 1-ah mi an inmansakte list hi an inpe tawn thin a. Nilaini khan Indian sorkar chuan civil mi 386 leh sangha mantu 53, Pakistani leh Pakistani nia hriat a kawl mekte hming a pe a. Pakistan pawhin civil mi 52 leh Indian nia hriat sangha mantu 198-te hming a pe ve bawk.
Nilainia ministry thuchhuah chuan, “Vawiin khan India leh Pakistan chuan New Delhi leh Islamabad-ah a rualin inbiakpawh tawnna hmangin civil mi leh sangha mantute inmansak mekte hming an inthleng,” an ti a. Hming inpek tawn hi kum 2008-a ram pahnih inremna ziah anga kalpui a nih thu an tar lang bawk.
Ministry chuan, “Indian sorkar hmalakna nghet tak avang hian kum 2014 atang khan Pakistan atangin Indian sangha mantu 2,661 leh civil mi 78 hruai kir an ni tawh a, heng zingah hian Indian sangha mantu 500 leh India civil mi 20, kum 2023 atanga tun thlenga Pakistan atanga hruai kir mi 20 an tel,” an ti bawk.
External affairs ministry chuan sorkar hian civil mi tang te, an lawng nena man sangha mantute leh Indian sipai bote chu Pakistan kut atanga rang taka chhuah leh hruai kir a phut fo tih a sawi.
“Pakistan chu Indian sangha mantu leh civil mi 188, an hremna hmang zo tawhte chhuah leh kirtir thuai turin ngen an ni a, hei bakah hian Pakistan hnenah hian an kuta civil mi 13, Indian nia rin, tun thlengin consular biakpawhtir la ni lote chu biakpawhtir nghal turin a ngen a ni,” an ti.
Indian sorkar chuan Pakistan chu India leh India mi nia rin tang zawng zawngte chhuah tur leh an haw hma chu an himna leh awm dan enkawl turin a ngen bawk.