Pak-ah India man duh ‘mi bawlhhlawhte’ zalenin leng
Pak-ah India man duh ‘mi bawlhhlawhte’ zalenin leng
India mai ni lo, khawvel pawhin a man duh em em mi pasarih, an lu man pawh dollar maktaduai tel chhiar mek, India leh pawn lama pawi tam tak khawia mi nunna tam tak la tawh mi pasarihte chu himna zawngin motel-ah an riak lawr emaw, ram hnuai kilkhawra an camp-ah emaw an awm lo, zalen takin Pakistan-ah lengin sipaiten an veng a, an duh tawkin pawi khawih turin ruahmanna an siam thei.
April thlaa Pahalgam-a mi 26 thah an nih hnuah khan a titu, Pakistan-a Lashkar-e-Taiba (LeT) nena inzawm thin, The Resistance Front pawh US chuan ‘firfiak pawlah’ a puang leh ta.
India tana ‘mi bawlhhlawh pasarih’ zinga hming hmasa ber chu Hafiz Saeed-a a ni.
Saeed-a hi LeT boss niin kum 1990 chho velah sipai pawl, Markaz-ud-Dawa-wal-Irshad a din atangin hriat a hlawh tan a. United States’ Office of the Director of Naval Intelligence (ODNI) chuan Islamic fundamentalist missionary group niin an sawi.
ODNI chuan LeT hi ‘Indian sipai leh civil mi beih kawnga mawhphurtu’ tiin a sawi a. Kum 2006-a Mumbai-a rel beihna leh Mumbai attacks 26/11 kha a langsar zual a ni a. He pawikhawihna pahnihah hian mi 360 chuang an thi.
US leh UN chuan a lu manah $ maktaduai 10 an chhiar a; mahse, Lahore-ah venhimna hnuaiah a awm mek a. Pakistan Minister Bilawal Bhutto-a chuan thla hmasa khan ‘house arrest’ a ni tih a sawi.
Saeed-a dawtah chuan Jaish-e-Mohammed (JeM) firfiak, Masood Azhar-a a ni a, Pakistan-ah sipaite venin a awm mek.
India-a Pulwama leh Uri terror attack-a mawhphurtu niin sipai 59 an that a. UN chuan kum 2019 khan ‘global terrorist’-ah a puang.
A dawt leh chu fundamentalist Islamic preacher, LeT-a langsar tak, Zakiur Rehman Lakhvi-a a ni a. Ani hi an pawla sipai hotu niin 26/11 Mumbai attack ruahmantu ber nia ngaih a ni.
A dawt leh chu Dawood Ibrahim-a a ni a, ani hi khawvela mi sual tlan bo langsar ber pakhat a tling a. D-Company crime syndicate chief a ni a, mi thah, mi that tura mi ruaitu, mi pawisa chhuhsak, ruihhlo tawlh leh firfiaka chetna avanga man duh lai a ni.
Kum 2003 khan India leh US chuan a hma kum 10 kal taa Mumbai-a bomb tihpuah avangin ‘global terrorist’-ah a puang a, US Federal Bureau of Investigation-in an ‘most wanted’-ah an telh a, a lu manah $ maktaduai 25 an chhiar mek.
Karachi-ah a awm nia hriat a ni a, ani pawh mi dangte ang bawkin zalen taka leng leh venhimna pawh pek nia hriat a ni.
India tana mi bawlhhlawh pasarih zinga pahnih dang chu unau, Iqbal Bhatkal leh Riyaz Bhatkal an ni a. Iqbal hi bomb tipuaktu a ni a, an unau hian Indian Mujahideen an din a, Riyaz-a hi an pawl sum hnar a ni.
An unau hian Karachi-ah khawsaiin India-in thlithlai reng mah se man theih loh tura venna pek an ni.