Pakistan-a US-Iran inbiaknaa inremna siam thei lo

Pakistan-a US-Iran inbiaknaa inremna siam thei lo
Pakistan khawpui, Islamabad-ah hun rei tak awha an inbiak hnuah US leh Iran chuan an indona tihtawp turin inremna an siam thei lo va, Pathianni khan palaite an haw ta ve ve a. Hei hian inkahhai an kalpui mek chu engtin zel nge an kalpui zui dawn a tichiang lo mek.
Chawlhkar ruk chuang kalta atanga mi sang tam tak thihna thlentu leh khawvel puma tuialhthei man a san phahna indona titawp tur hian Inrinni tlai atang khan darkar 21 chhung an indawr a ni.
US palaite hotu, Vice President JD Vance-a chuan Islamabad a chhuahsan hma lawka thuthar lakhawmtute a kawmnaah, “Thu lawmawm loh tak chu, ‘inremna kan la siam lo’ tih hi a ni a, hei hi United States of America tana thu tha lo a nihna aiin Iran tana tha lo zawk niin ka ngai,” a ti.
“US-ah kan kir ang a. Kan tawlh theih chin hi eng nge a nih tih kan sawi chiang hle a ni,” a ti.
US leh Iran palaite hian Islamabad an chhuahsan tawh tih Pakistan pawhin a sawi tawh.
Vance-a chuan Iran-in American-te rawtna pawm loh a thlang tih a sawi a, hetah hian nuclear ralthuam siam loh pawh a tel tih a sawi.
“Nuclear ralthuam an siam dawn lo tih leh rang taka nuclear ralthuam an neih theihna tur hmanrua an dap dawn lo tih a chianna kan hmuh a ngai a. Chu chu US president thil tum ber a ni a, inbiakna hmanga kan tum ber pawh a ni,” a ti.
Kar hmasaa inkahhai a nih hnua Islamabad-a inbiakna hi kum sawm chuang chhunga hmaichhana US-Iranian inbiakna hmasa ber a ni a, kum 1979 Islamic Revolution hnua indawrna sang ber a ni bawk.
Iran-a Tasnim news agency chuan US thil phut ‘sang lutuk’ chuan inremna siam a tiharsa niin a tar lang a. Iranian chanchinbu dangte chuan thil eng emaw zatah inremna awm mah se, Strait of Hormuz leh nuclear program chu an inrem theih lohna ber a nih thu an tar lang hlawm bawk.
Iranian foreign ministry thupuangtu chuan inbiakna hi inrintawk lohna boruak hnuaia neih a nih thu a sawi a. Chanchinbute chuan thupuangtu thusawi tar langin, “Session khat chhung chauha inremna siam kan beisei lohna hi thil pangngai a ni,” a ti.
Hetih lai hian Pakistani Foreign Minister Ishaq Dar-a chuan February 28-a US leh Israel tang dunin Iran an beih atanga indona kal mek tihtawp tuma Thawhlehnia inremna an siam, kar hnih chhung inkahhai chu vawn reng chu thil pawimawh tak a nih thu a sawi.
Israeli Security Cabinet Minister Zeev Elkin-a chuan Army Radio hnenah inbiakna tam neih chhunzawm chu duhthlan tur a la nih thu a sawi a, hetih rual hian, “Iran hi mei hmangin an infiam a ni,” a ti bawk.
Thuthar lakhawmtute a kawmna tawi a neihah Vance-a chuan Strait of Hormuz hawn leh a nih thu a sawi lo va, hei hi indona a chhuah atanga Tehran-in khawvel energy phurh 20% kalna dawng a dan kha a ni.
Vance-a hian an indawr chhung pawhin President Donald Trump-a nen vawi tam an inbiak thu a sawi a. Inbiakna lai ngei pawhin president hian inremna siam a ngai kher lo tih a sawi ve bawk.
“Inremna siam leh siam loh chuan ka tan danglamna a awm lo, kan chak tawh tho,” tiin Zirtawpni khan thuthar lakhawmtue hnenah a sawi.
US palai zingah hian special envoy Steve Witkoff leh Trump-a makpa, Jared Kushner te pawh an tel a. Iran team-ah hian Parliamentary Speaker Mohammad Baqer Qalibaf leh Foreign Minister Abbas Araqchi te an tel a ni.
Ram pahnih aiawhte inbiak hi Inrinnia tan niin zanah pawh an chhunzawm a, Pathianni tuk thleng inbiak a ni.
Iran hian Strait of Hormuz thunun a phut a, indona avanga an rama thil chhiate zangnadawmna pek leh Lebanon-ah inkahhai a phut bawk niin an sorkar Iran TV leh thuneitute chuan an sawi.
US hian Iran-in nuclear ralthuam a siam loh a duh ber a. Tehran hian hun rei tak atang tawhin nuclear ralthuam hi neih a tum ngai lo niin a lo sawi tawh thin thung.