Pakistan hnena thu pawimawh hrilhtu pahnih man

Pakistan hnena thu pawimawh hrilhtu pahnih man
Punjab Police chuan mi pahnih, Amritsar-a Army Cantonment vel leh Air Base thlalak leh thil pawimawh dangte Pakistan intelligence operative-te hnena pe chhawngtu nia hriat chu an man tih Pathianni khan an sawi.
An mi mante hi Palak Sher Masih leh Suraj Masih te an ni.
ANI hnenah Rural Amritsar Senior Superintendent of Police (SSP) Maninder Singh chuan, “Punjab Chief Minister Bhagwant Mann leh DGP Gaurav Yadav te hnen atangin ram do zawnga chete nia kan hriatte chu mana lung ina dah hmak tura tihna kan hmuh angin hma kan la a. Palak Sher Masih leh Suraj Masih chungchang hi kan hria a, an pahnih hian Pakistan Intelligence Operative-te nena inpawh tak niin hmun pawimawhte awm dante an hrilh a. Kan man ve ve a, an hnen atang hian thil tam tak kan hmu chhuak,” a ti.
SSP Singh-a chuan, “Thawhpui pakhat, Harpreet-a an nei a, ani hi ISI nena indawr thin a ni a, Amritsar Jail atanga lak chhuah kan dil a, a lakah NDPS thubuai ziah luh tawh a ni,” a ti bawk.
SSP Singh chuan heng mite hi thil tenau deuh hrilhah Rs 5,000 leh pawimawh zual, sipai chetvel dan hrilhah Rs 10,000 hlawh thin niin a sawi a. “Official Secrets Act leh Information Technology Act hmangin FIR ziah luh a ni a, kan chhui mek zel,” a ti.
Police hian an mi mante kut atang hian puak thei tam tak leh RDX pawh an man a. SSP Singh chuan, “A tirah chuan ramri atangin heroin an la lut phawt a, tunah chuan thil pawimawh hrilhtu an ni ta a. He thu kan hriat veleh hian che chhuakin kan man ta nghal a ni,” a ti.
“Sipai inbunna pawimawh leh chet vel dante chu Pakistan intelligence operative-te hnenah hrilhin kan hmelmate chet lakna turah an pui a. Tunah erawh man an ni ta a, na takin an chungah hma lak a ni ang,” a ti.
April 22-a Pahalgam-a mi firfiakten mi 26 an thah hnuah India leh Pakistan inkar hi a chhe thar hle a. Cabinet Committee on Security (CCS) chu April 23 khan an thukhawm nghal bawk.
CCS hian beihna thleng hi an dem thu leh a tuartute an tawrhpui thu an sawi a, hliam tuarte pawh an dam leh thuai an duhsak tih an sawi.
Prime Minister Narendra Modi-a sorkar chuan firfiakte chetna chhang let tur hian an tih dan tur, an bitum tur leh an chet hun turah sipaite zalenna a pe a. Sorkar hian Pakistan chu nasa taka hrek nghalin Indus Water Treaty a titawp lailawk a, ramri kâna firfiakte chetna thlawp zawnga Pakistan a la che reng chu a dem bawk.