Pakistan-in Kabul-a ruihhlo ngai enkawlna a beihah mi 100 vel thi

Pakistan-in Kabul-a ruihhlo ngai enkawlna a beihah mi 100 vel thi
Pakistani thlawhnaten Afghanistan khawpuia ruihhlo ngai enkawlna hmuna an kahnaah mi 100 chuang an thi tih forensic laboratory thuneituten an sawi.
Ruang thenkhat chu hriat theih loh khawpin a chhia niin Kabul Forensic Medicine department thuchhuah chuan a tar lang a. Taliban thuneitute chuan thi zat hi hei aia tam zawk niin an sawi a. UN chuan rang taka chhui chian an phut.
Pakistan chuan he hmun hi an kap tih an pha a, ‘sipaite thil leh firfiakte puihna hmunhmate an bitum’ tih an sawi.
Ramri kaltlanga buaina hi thla hmasa khan a chhuak a, Pakistan chuan Afghanistan-in a ram beitu firfiakte a hum thu a sawi a, Kabul chuan a pha thung.
UN Assistance Mission in Afghanistan (Unama) chuan he thil thleng hi a dem thu sawiin, Pakistani sipaiten Omid Addiction Treatment Hospital an beih niin an sawi.
Thuchhuah chuan, “Unama chuan inepna tihtawp leh inkahhai nghal a phut nawn leh a, civil mite himna tur atana khawvel dan hnuaia lehlam lehlamin an tih tur zawm turin a ngen nawn leh a ni,” an ti.
A hmuna thuneitute chuan rehab centre-ah hian mi 2,000 vel an awm niin an sawi a, thi pawh za tam tak an awm an ring.
Afghan health ministry thupuangtu, Sharafat Zaman Amarkhail-a chuan BBC hnenah rehabilitation centre bulah sipai hmun a awm lo tih a sawi.
Thawhtanni zan dar 08:50 (India-a zan dar 09:50) vel khan Kabul khawpui pumah puak ri nasa tak an hriat thu mipuite chuan an sawi a, hemi hnu hian thlawhna leh air defense system ri a ri leh bawk.
Centre-a enkawl mek chhungte chu pawnah an pungkhawm a, beidawng takin an hmangaihte chanchin hriat tumin an ngaichang.
Taliban sorkar thupuangtu chuan thi zat hi a tlem berah mi 400 an tling tih a sawi a, Thawhlehni tlai khan ruang 30 chuang chu phurh chhuah a ni tawh.
Pakistani information ministry chuan Kabul leh khawchhak province, Nangarhar-a beihpui an thlak hi ‘a tul lo pawi khawih a awm loh nan chiang tak leh uluk taka kalpui a nih thu’ a sawi.
Afghanistan-in a sawi chu ‘thu dik lo… a tha lo zawnga rilru chawh thawh tumna, ramri kâna firfiakte dan lova thlawpna’ tiin a hnawlsak.
Tun hmaa US sipai hmunpui ni thin, beih tawkte hmun hi ruihhlo ngaite awmkhawmna hmun lian tak a ni a. August, 2021-a Taliban-in thuneihna an chan leh khan he hmun hi rehabilitation centre-ah an chantir a, khawpui chhung hmun hrang hrang atangin hmangtu an awm.
Chhanchhuaktute chuan Thawhlehni thleng khan damchhuakte an zawng chhunzawm a. Zingah a lan chian hnuah chuan tukverh kang, blanket leh pheikhawk darh, in chim chhiate a lang nasa hle.