Pakistan in rel service titawp lailawk

Pakistan in rel service titawp lailawk
Pakistan chuan thawhtanni atang khan an ramchhunga rel tlante chu a chawlhtir rih a, rel service zawng zawng bakah thawktute pawh an chawl bawk.
Kartawp khan Pakistan khawthlang lam rel station pakhatah bomb puakin, hetah hian mi 26 in nunna an chan a, thi zingah hian sipai leh rel hnathawkte pawh an tel a ni.
Pakistan railway chuan thuchhuah siamin, venhimna lam a that zawk nan rel service chu ni li chhung tihtawp lailawk a nih thu an sawi a, rel service te chu venhimna khauh lehzual pek dan tur thlenga ngaihtuah a nih tur thu an sawi.
Pakistan-ah hian bomb hmanga inbeihna a thleng zing hle a, tunhnai thla hnih chhung ringawt pawh khan mi tam takin thih phahin, an zingah hian ramdang mite pawh an tel bawk. Hei vang hian Pakistan sorkar chuan ramdang nena inlaichinna kawngah vaukhanna a dawn phah hial tawh a ni.