Pakistan vantlang inkhawma bomb puakah mi 11 thi

Pakistan chhimthlang lama Quetta khawpuia vantlang inkhawma bomb puakah mi 11 vel an thi tih sorkar hotuten an sawi.
Thawhlehni zan tlai tawh taka bomb puak hi Islamic State hel pawl chuan an tih a ni tih Nilaini khan thuchhuah siamin an puang.
Sorkar hotu, Hamza Shafaat chuan an ram hruaitu leh an province-a chief minister lo ni tawh, Sardar Ataullah Mengal-a thih cham puala vantlang inkhawmah bomb hi a puak tih a sawi.
Inkhawmah hian a fapa, Sardar Akhtar Mengal-a pawh a tel a, a him hlauh tih Shafaat-a chuan a sawi a, mi dang 30 velin hliam an tuar bawk niin a sawi.
“Inkhawm hi a tawp a, miin a hmun an chhuahsan lai vel takin lirthei hunna hmunah bomb hi a puak nia sawi a ni,” a ti.
Police chuan he thil thleng hi an chhui zui nghal mek a, thihchilha tihpuah ni ngeia a lan thu police hotu, Athar Rasheed-a chuan a sawi.
Quetta hi hel pawl tamna leh buaina thlen fona, Balochistan province khawpui niin Afghanistan leh Iran nena an inrina a ni bawk a. Islamist hel leh Baloch inlakhran tum pawl hrang hrang tamna hmun a ni a, tharum thawhna pawh an thlen fo thin.