Palace in City an chelh, Chelsea an chak ve ta

Inrinni zan khan English Premier League 2023-24 khelh chhunzawm a ni a, champion lai Manchester City chu si hnih an phurh hmasak zet hnuin an mikhual Crystal Palace lakah an chak zo lo. City an chak zawh loh lai hian chak harsat Chelsea chuan an mikhual Sheffield United an hneh a, an chak ve nawlh thung.
City an chak zo lo
Champion lai Manchester City chu an mual Etihad Stadium-ah an forward pawimawh Erling Haaland tel lovin an inlan. Haaland aw lo mah se si hnih faia hma an hruai vangin chak ngei tura ngaih an ni hman tho. An mualah ngei si hnih faiin hmahruai mah se hun tawp dawn hnaihah an chesual a, goal hnih chhuahin uiawm takin an chak zo lo. Crystal Palace nen 2-2 a an inhnehtawk vangin Crystal Palace hi palinaah an tlahniam hial tawh a. Khel tam zawk ni chungin Liverpool nen an inkarah point thum a tlazep tawh.
City hian an mualah an khel chhe hran lova, minute 24-naah Jack Grealish chuan Phil Foden siamsak tha tak atangin hmahruaina goal a thun. Hmahruaina goal an thun hnuin inrintawkna sang zawk nen an inlanchhunzawm. Ball chang tam zawk niin, an mikhualte an nawr bet viau a, Julian Alvarez chuan goal thun theihna hun tha zet mai hlah a, chawlhlawk hmain goal an thun belh thei lo.
Second half-ah City in bul an tan tha lehzual a, goal an thun belh thuai. Alvarez free-kick chhuih luh hnawl a nih hnuin minute 54-naah Rico Lewis chuan hnaite atangin a pet goal a, an goal hnihna a thun. City in si hniha hma an hruai vangin chak tur zawk a chiang thawkhat a ngaih a ni a, Pep Guardiola team in point thum an hmu ngei tura ngaih a ni.
Champion lai City lakah si hnih phur mah se Crystal Palace an hnual mai lova, huaisen takin an khingpuite an nawr let. Hun tawp dawn hnaih minute 76-naah fuh zetin City an nawr tlang a, Schlupp siam tha tak chu Jean-Philippe Mateta chuan chiang zetin a pet goal a, an si phurh a sut then. An si phurh sut thenna goal an thun vangin Eagles an phur thar a, point hmuh ngei tumin tan khawhin hun pek belhah goal an thun leh ta nge nge. Midfielder Phil Foden chuan ball petchhuah a tumna lamah chiang zetin Jean-Philippe Mateta a pet fuh a, penalty a chawi. He penalty hi Michael Olise chuan minute 90’+5-ah a pet goal a, an si phurh a sut zo. An si phurh an sut zawh hnuin an nawr tlang nawn leh a, goal thun theihna hun tha an neih an chhawr tangkai zo lo va, Eithad Stadium-ah ngei uiawm takin an chak zo ta lo.
Season liam taah ropui taka inlan a, treble champion ni hial City in tunhnaiah ngai an awh lo va, chak loh khut an ching thar. Crystal Palace laka an hmahruaina an humhim zawh loh vangin City hian hniam lam an pan zel a, palinaah an tlahniam hial tawh. City laka tlawm pumpelh Crystal Palace hi 15-naah an awm chhunzawm ve thung.
Chelsea an chak ve ta
Team lian, player lei nana sum seng hnem ni chunga chak harsat, 11-na hiala awm hman Chelsea chuan hnehna an chang ve ta nawlh a. Blues hian Stamford Bridge-a an mikhual Sheffield United chu si hnih faiin an hneh.
Chak harsat Chelsea hi table mawngphah Sheffield United lakah an khel tha viau naa goal erawh an thun mai thei lova, goal thun turin second half an nghah thlen a ngai. Chawlhlawk hmaa goal thun thei lo Blues hian chawlhlawk hnu lamah bul an tan tha a, goal an thun thuai. Minute 54-naah Cole Palmer chuan Raheem Sterling siamsak atangin hmahruaina goal a thun a. Minute 61-naah Nicolas Jackson chuan Palmer siamsak atangin an goal hnihna a thun zui leh a, an mualah ngei si hnih faiin an chak a, point thum an hmu ve leh ta nge nge.