Palace leh Ferrest in FA Cup semi-final an lut

Inrinni zan khan FA Cup quarter-final khelh tan a ni a, Crstal Paalace leh Nottingham Forrest ten hnehna changin semi-final an lut.
Inkhel an hmachhawn hnuhnung palia chak zawn tawh Crystal Palace hi Fulham hmachhawn turin Craven Cottage-ah an lenglut. An len luhna mualah an khel tha viau a, 3-0 ngawtin hnehna an chang. Palace tan hian Eberechi Eze chuan minute 34-naah hmahruaina goal a thun. Eze goal thun vangin mualneitu Fulham an talbuai a, goal an chhuah belh leh thuai. Mualneitu Fulham buai zual laiin Palace in an khingpuite an nawr zui chiam a, Ismaïla Sarr chuan minute 38-naah goal a thun belh leh a, 2-0 a hmahruai chungin chawlhlawk an hmang.
Chawlhlawk hnu lamah Fulham in an si phurh sut ngei tumin tan khawh mah se goal an thun thei lova, goal an chhuah belh hial zawk. SI hnih faia hmahruai tawh Crystal Palace tan Eddie Nketiah chuan miute 75-naah an goal thumna thunin, an hmahruaina a tizau. Nketiah goal thun hnu hian goal dang a luh belh thei tawh lova, Crystal Palace chuan Fulham lakah 3-0 ngawta hnehna changin FA Cup semi-final an lut. Fulham lakah an chak leh tak vangi Crystal Palace hi vawi nga an chak zawn ta chiah a, tunhnaiah an khel tha hle.
Fulham mualah Crystal Palace an chak rual hian Nottingham Forrest pawhin Brighton mualah hnehna an chang a, FA Cup semi-final an lut ve nawlh bawk.
Season kal mekah beisei phak baka khel tha, EPL-ah pawh pathumna ni mek Nottingham Forrest hi Brighton & Hove Albion mual American Express Stadium ah an lenglut a, mikhual an nihna hmunah goal thun thei lo mah se goal an chhuah bik lo. Hun pangngaiah goal thun an awm theih loh vangin penalty shoot-out hmangin semi-final lut tur zawn chhunzawm a ni. Tie-break ah hian Nottingham Forrest tana pettu Neco Williams chuan thelh bawk mah se, Brighton tana pettu pahnih Jack Hinshelwood leh Diego Gómez ten an thelh zawn a. Ryan Yates chuan Nottingham Forrest chakna goal a thun a, Brighton lakah hian 4-3 a hnehna changin kum 1991 hnu lamah a vawi khat nan FA Cup semi-final an lut zui ta a ni.