Palestine ram kan pawm dawn – French President Macron

Palestine ram kan pawm dawn – French President Macron
French President Emmanuel Macron-a chuan Gaza-a mipui riltama an awm nasat avanga khawvel a thinrim mek karah France chuan Palestine chu ram pakhatah an pawm dawn tih a puang.
Macron-a hian X-ah a thu puan chu September thlaa United Nations General Assembly-ah a pu lut dawn tih sawiin, “Vawiina thil hmanhmawhthlak chu Gaza-a indona titawp leh civil mipuite chhan a ni,” a ti.
French president hi Oct. 7, 2023-a Hamas-ten an beih khan Israel thlawptu niin Juda huatna chu tha a tih loh thu a sawi a; mahse, indona kal zelah Israel chet dan avangin a lawm lo hle tawh.
France hi rama Palestine pawmtu Europe ram lian leh thiltithei ber a ni a. Ram 140 chuangin Palestinian-te ram hi an pawm a, heng zinga tam tak hi Europe-a mi an ni.
France hi Europe-ah chuan Juda tamna ber niin Europe khawthlanga Muslim tamna ber ram a ni bawk a, Middle East buaina duh lohna lantir pawh an ramah hian a thleng nasa hle.
Israeli foreign ministry chuan Macron-a thu sawi chungchang hi engmah an la sawi lo.
French foreign minister chuan karlehah hian UN-ah ram pahnih inkar chin felna tur sawihona a thleng dawn a. Thla hmasa khan Macron-a hian ‘Palestine chu rama pawm mai’ tumna rilru an put thu a lo sawi tawh a, Israel ang bawka mahnia inven theihna dikna a neih theihna tura huai taka ram pahniha pawm mai chu tula a hriat thu a sawi a ni.
Macron-a’n hetiang thutlukna a puan me lai hian Qatar-a Gaza-a inkahhai a awm theih nana inbiakna kal meka US palai chu a haw a, Hamas-in rinngamin thil an kalpui lo niin a sawi.
Gaza-a indonaah hian tun hnaiah Israel chu a chet dan avangin sawi a hlawh hle a. Kar tirah khan France leh Europe ram tam tak chuan Israel-in Gaza-a lut tur tanpuina bungrua a dang tlat leh ei tur semna hmuna Palestinian za tel thah an ni chu an dem thu an sawi.
Palestinian-te hian Israel-in a luahsak West Bank, Jerusalem khawchhak leh Gaza chu ram pakhata neih an duh a, heng hmunte hi Israel-in kum 1967-a indona atang khan an luahsak a ni hlawm a. Israel sorkar erawh chuan Palestinian-ten ram an neih hi an do tlat a, Hamas-in Oct. 7, 2023-a an ram an beih hnuah phei chuan an phal lo zual a, hel pawl hi chhut chimih tumin an bei mek zel.
Israel hian Jerusalem chhak lam hi kum 1967 indo tan hnu lawk atanga luahin an khawpui pakhatah an chhiar a. West Bank-ah pawh chenna tur tam tak sain Juda, Israeli khua leh tui 5,00,000 chuang an awm mek a. He hmunah hian Palestinian maktaduai thum chuang zet Israeli sipai thununna hnuaiah an khawsa a, Palestinian Authority-in rorelna fawng chelh mah se thuneihna chin an nei a ni.