Palestinian leh Arab ram dangten Trump-a rawtna hnawl

Palestinian president chuan President Donald Trump-a’n US-in Gaza laka a mi cheng Palestinian maktaduai 2.1-te hmun danga sawn chhuah a tumna chu na takin an do tih a sawi.
“Kan mite dikna chanvo hi hetianga palzut leh tih kan phal dawn lo,” tiin Mahmoud Abbas chuan a sawi a, Gaza chu ‘Palestine ram laili’ a nih thu leh tihluihnaa a chengte um chhuah chu khawvel dan bawhchhiatna a nih thu a sawi.
Thla 15 zet Hamas leh Israel indonain Gaza hi a tichhe nasa hle a, Trump-a hian helai rama ‘mei kang meka tuialhthei leih’ a ruahman a ni.
Arab ramte pawhin Trump-a rawtna hi an hnawl a, Saudi Arabia chuan Palestinian-te tan ram a awm lo a nih chuan Israel nena an inkungkaihna a awm loh nghal tur thu a sawi.
An thenawm, Egypt pawhin thla hmasaah tawh khan Trump-a rawtna hi an duh loh thu an lo sawi tawh a; Gaza-a cheng tam tak kawl mektu, Jordan pawhin Palestinian-te khawih che lova tun din leh a tul zawk thu a sawi.
Hetianga rawtna hi Gaza-a Hamas leh Israel inkahhaiin chawlhkar hnihna a kal mek laia awm a ni a. Hetih chhung hian Hamas chuan an mi hren chhuahin Israel pawhin an lung ina Palestinian an mante an chhuah ve bawk.
Israeli sipaite hian October 7, 2023-a an ram rûna mi 1,200 chuang thata hren tura mi 251 hruaitu, Hamas-te chhut chimih tumin Gaza hi a bei a ni.
Sipaite an chet atang hian tun thlengin mi 47,540 thiin mi 1,11,600 vel hliam an awm tawh niin Hamas enkawl health ministry chuan a sawi.
Gaza-a cheng tam zawk hi indona a awm chhungin an tlanchhe nasa a, in ding 70% dawn chhia a awm a. Damdawi in, tui lakna, hnawm paihna leh sawngbawlna zawng zawng a chhia a; ei tur, tuialhthei, damdawi leh awmna tur a vâng hle bawk.
President Trump-a hian Middle East policy puangin Israeli-Palestinian buainaa US ngaihdan a sawi chhuak a. Thawhlehni zana White House-a Israeli Prime Minister Benjamin Netanyahu nen an inkawmnaah a sawi.
“US hian Gaza Strip hi a la chhawng ang a, kan hna kan thawk ang,” a ti a. “Kan nei ang a, bomb puak lo la awm leh ralthuam hlauhawm zawng zawng kan dap ang a, a hmun hi kan thian ang a, in chhiate pawh kan senghawi vek ang,” a ti.
Trump-a chuan tuna Gaza-a cheng Palestinian maktaduai 1.8 chuang chu en hmathlir, ‘Riviera of the Middle East’ din nan hmun danga an sawn a tul tih a sawi a, Jordan, Egypt leh ram dangah an dah dawn niin a sawi.
Chung mite chu an haw leh phalsak an ni dawn em tih zawhna chu Trump-a chuan ‘khawvel mite’ an cheng dawn tih a sawi phawt a, a hnuah ‘Palestinian-te pawh’ a ti zui leh.
Trump-a hian hetiang a rawtna lo hnawl tawh, Jordan leh Egypt pawh an thinlung hawnga hetiang an tih theih nana ram chu tha taka pe turin a ti bawk.
Netanyahu chuan Trump-a rawtna hian ‘history a thlak dawn’ tih a sawi a, ‘ngaihven phu tak thil’ niin a sawi a. “Middle East hmelhmang kan thlaka muanna kan neih theihna tura ngaihtuahna senna a ni,” a ti.
Hetih lai hian Palestinian hruaitute chuan rawtna hi an duh loh thu Nilainia thuchhuah an siamah an tar lang.
“He thil hi khawvel dan palzamna pawi tak a ni,” tiin President Abbas chuan a sawi a, ‘Palestinian ram din a nih loh chuan helaiah hian muanna leh nghehna a awm ngai lo vang’ tih a sawi bawk.
Abbas-a hi Hamas elpui, Fatah hotu niin Israeli-te luah, West Bank-a roreltu a ni.
Palestinian-te chuan ‘an ram, an dikna leh an hmun thianghimte chu an hlan dawn lo’ tih a sawi a, ‘Gaza Strip hi West Bank leh East Jerusalem te nen Palestine ram laili a ni’ tih a sawi bawk.
Israel, US, UK leh ram dangte pawhin firfiak pawla an chhal, Hamas chuan Trump-a rawtna chu ‘United States-in Gaza Strip luah a tum vang’ niin an sawi.
Rawtna chuan ‘kan mite nawr chepin chu chuan remna leh muanna a thlen dawn lo’ tih an sawi.
Gaza-a Palestinian-te pawhin rawtna chu tih awm loh a nih thu an sawi a. “Kum khat leh a chanve dawn bomb leh chhiatna kara kan awm chung pawhin Gaza-ah kan la awm zel zawk a nih hi,” tiin pa pakhat chuan a sawi.
“Chhuahsan ai chuan kan thi mai ang. Kan din thar leh hma zawng kan awm ang a, Trump-a hian a duh chuan a ti thei pawh a ni thei; mahse, he thutlukna hi chu kan duh lo bur a ni,” a ti bawk.
Khawvel danah tihluihnaa ram khata chengte sawn hi dan bawhchhiatna a ni.