Palestinian naupang sang telin nu leh pa chân tawh

Palestinian naupang sang
telin nu leh pa chân tawh
Israel-in Gaza Strip a beih hnuah Palestinian naupang sang telin an nu leh pa an chân tawh niin Palestinian Central Bureau of Statistics-in a sawi.
Palestinian Children’s Day hma ni, Ningania agency-in thuchhuah an siamah Gaza-a naupang 39,384-in ni 534 chhung Israel-in a beih tawhah an nu leh pa emaw, pakhat zawk emaw an chân tawh a, mi maktaduai 2.3 chuang an baihvai mek tih a sawi.
Bureau chuan heng zinga naupang 17,000 chuangin October, 2023 hnuah nu leh pa an chân kawp tawh niin a sawi bawk.
“Heng naupangte hi hrehawm takin an awm a, tam tak chu vantlang leh rilru lama an hrehawmna hnemtu awm lovin puan inah te, in chhe tawhah te an khawsa a ni,” tiin bureau thuchhuahah tar lan a ni a. “Gaza Strip hi tun lai khawvela hnuchham an awm nasatna ber a ni mek,” an ti.
Thuchhuahah hian Israel-in Gaza a beihnaah naupang 17,954 an thi tawh a, heng zinga 274 hi piang hlim niin 876 chu kum la tling lo an ni tih tar lan a ni.
“Naupang 17 chu puan inah khaw vawtin a hmet hlum a, 52 dang chu riltamin an thi bawk,” an ti.
Bureau hian naupang 60,000 chu ei tur neih that loh vangin thi mai thei dinhmunah an ding mek niin an sawi bawk.
Inkahhai puan a tawpa Gaza-a inbeihna a intan leh hnuah Israel hian ramri kânna a khar a, mihring ni tin mamawh a lut thei lo.
January atanga thla hnih chuang inkahhai kalpui a nih hma pawh khan Israeli sipaiten ramri hi an khar a, puihna thil lut tur tam tak an lo dang tawh bawk.
Gaza-a Government Media Office chuan kar tirah khan Israeli sorkar hmalak dan chu ‘tum nei taka mi tamtir tumna’ tia sawiin puihna leh chhangphut lut a awm loh avangin chhang siamna hmunte pawh khar a ni tih a sawi.
Bureau chuan Gaza leh West Bank-a Palestinian awm maktaduai 5.5 awm zinga 43% chuang chu kum 18 hnuai lam an ni tih an sawi.
March 18 atanga Israeli sipaiten beihpui an thlak thar leh hnuah Gaza-ah hian Palestinian 1,160 chuang thah an ni leh tawh.
October, 2023 atanga beihpui an thlakah Palestinian 50,523 vel an thi tawh a, a tam ber hi naupang leh hmeichhia niin Gaza-a Ministry of Health chuan a sawi.
Report chuan October 7 hnuah khan Israeli sipaite hian naupang 1,055 chuang an hreng tawh a, a tam ber hi West Bank-a mi an ni tih an sawi a. Naupang 350 chuang Israeli lung inah an la awm niin tar lan a ni bawk.