Pamela Anderson leh Liam Neeson ‘The Naked Gun’

Pamela Anderson kha kan la hria ang a, Star TV hunlaia Baywatch atanga kan hmelhriat kha, tunah chuan a kum te pawh a lo tam ve ta a ni mahna, khatiang hunlai nen kha chuan a danglam ve ta khawp mai. Kha Pamela Anderson kha, Liam Neeson nen ‘The Naked Gun’-ah an changdun a, July ni 22 khan London-a he film premiere red carpet-ah an inlan dun a nih hi. The Naked Gun hi August ni 1 atangin cinema hall-ah an chhuah tan ang.
Red carpet-ah hian boruak an siam deuh hak a, Pamela hi Liam-a awmah bei deuh hnâpin, a biangah a chuks zauh a, Liam hian nui var var chungin a lo kuah let ve bawk.
Anni pahnih hi zawnglai ve ve an ni bawk a, an inkarah tek deuh sek sek a awm te pawh a ni mah na! Mahse, a nupui boral ta Natasha Richardson nena fa pahnih- Michael Neeson, kum 29, leh Daniel Neeson, kum 28, te nei tawh Liam Neeson hian 2024 khan People magazine-in an kawmnaah ngaihzawng neih lam a ngaihtuah tawh rih lo niin a sawi a, mahse, kha chu 2024 daih tawh kha a nia!
Pamela pawh hi a ex Tommy Lee nena fa pahnih- Brandon Lee, kum 29, leh Dylan Jagger Lee, kum 27, nei tawh a ni a, 2022 khan a pasal pangana Dan Hayurst nen an inthen fel a, 2023-a documentary ‘Pamela, a Love Story’ an tihchhuahah a fate pa nena an inkawp leh te a nih ngawt loh chuan mahni tawka awm a thlang tawh zawk niin a sawi a, a fate pa Tommy nena inkawp leh lah chu, “Mahni inhremna a ni ringawt. A tih a tih chi a ni tawh lo,” a ti bawk si a, mipa lakah a beidawng ve tawh viau te pawh a ni mah na. Mahse, Liam-a awm nghenga bei hi a lo nuam hlu hlu viau te a nih chuan a rilru thlak leh pawh a harsat vak lo ang a!