Panganaah Villa

Thawhleh zana English Premier League khelhah Aston Villa chuan an mikhual Fulham chu si khat faiin an hneh a, panganaah an inhlangkai. Inkhel dangah Wolves in si hnih faiin an hnehna an chang a, him an hnaih lehzual.
Paruknaa awm mek Aston Villa hian Villa Park-ah pakuanaa awm mek Fulham an mikhual a, an mikhual lakah an chak a nih chuan Tottenham an lehpelh theih dawn vangin chak an mamawh hle. An mualah point thum hmuh ngei tumin thapui an thawh a. Tyrone Mings goal hmangin hnehna hlu tak an chang a, panganaah an inhlangkai.
Villa Park a lenglut Fulham hian bul an tan tha a, inkhel tan tirhteah goal an thun nghal teuh hle. Andreas Pereira chuan mawi leh fuh takin acrobatic volley nei mah se goal pawnah uiawm takin a pet chhuak a, goal thun theihna hun tha an neih chu uiawm takin a hlah.
Mikhual team in hun tha an hlah hnuin Villa in goal thun tumin tan an khawh zui chiam a, goal an thun ta nge nge. Minute 21-naah McGinn corner pet tha tak chu Tyrone Mings chuan fuh zetin a tauh goal a, hmahruaina goal a thun. Minute 21-naa Mings goal thun hi hun tawp thlengin an humhim a, an mualah point thum hlutak an hmu.
Fulham lakah point thum an hmuh vangin Aston Villa in European competition khelh phak an beiseina a sang thar leh zual. Villa hian khelh 33 atanga point 54 hmuin pangana an luah mek a. An hnuai chiaha awm Tottenham aiin vawi khatin an khel tam zawk thung. Pasarihnaa awm mek Liverpool nen an inkar a zim viau bawk a. Aston Villa, Tottenham leh Liverpool te hian Europa League khelh phak tumin inelna hautak an hmachhawn zui ang.
Thawhleh zana inkhel dangah 13-naa awm mek Wolves chuan an mikhual Crystal Palace chu si hnih faiin an lo hneh a, Wolves hian him an hnaih leh zual sauh a, 13-naah an insawh nghet.
Molineux Stadium a lenglut Wolves hian bul an tan chhe viau a, minute thumna lekah Joachim Andersen chuan an lamah ti-goal in Wolves hmahruaina goal a thunsak. Hma takah an lama an tih goal hnuin hun tawp dawn hnaihah Wolves hian penalty an chawi zui leh a. Minute 90+4-ah Rúben Neves chuan penalty pet goal in an hmahruaina a tizau a, Wolves hi an chak zui ta a ni.