Paris 2024 Olympic-ah zu a zalen dawn lo

Paris 2024 Olympic-ah zu a zalen dawn lo
France ram chuan zu khapna dan chungchangah dan ding lai ‘Evin’s Law’ an tih chu an nei a, nakuma France rama nghah tur Paris Olympics organiser-te chuan he dan ding lai hi inelna kalpui chhung atana ngaihnathiamna (exemption) an dil loh tur thu an tihchian tak avangin Paris 2024-ah hian zu a zelen dawn lo!
Kum 1991 atanga France rama an hman tan Evin’s Law an tih hnuaiah chuan France rama stadium chhungah mipui nawlpui tan zu hralhchhuah phal a ni lo a, mahse, kum tinin an rama inenlan lian thenkhatah he dan hi thlahdul chang an nei thin a, hetih lai hian a ram mite dan hman lai hi Games organiser-te chuan Olympic chhunga hlih an dil buai duh ta lo tih Paris 2024 thupuangtu chuan thuthar thehdarhtu lian Reuters a hrilh.
Kumin September thla hian France chuan Rugby World Cup a thleng dawn a, he tournament chhung hi chuan stadium chhungah inkhel entute’n zu an in thei thung ang.
Evin’s Law hnuaiah hian khual pawimawh VIP guest-te chuan an tana hmun buatsaih bik chhungah zu an in thei a, mipui nawlpui tan erawh phal a ni lo.
Paris 2024 thupuangtu chuan, “Nakum Olympic-ah hian ni 15 chhungin inelna session 700 chuang huaihawt a ni dawn a, buangbar lo leh hun hek lo zawka inelna a kal tluan theih zawkna a nih beiseiin French law hi Games chhung atana hlih kan dil ta lo mai a ni,” a ti.
Tarlan tak angin, kumin September leh October thla chhunga khelh tur Rugby World Cup huaihawttute thung chuan France rama tournament khelh a nih chhung atan zu chungchanga France ram dan dinglai chu kenkawh loh an dil a, phalsak an nih angin fans lamin inkhel en pahin an zu pai an khiat thei dawn!
Kum 2022 Champions League final khelh lai pawh khan Paris khawpuia an khelmual roh ber Stade de France chhungah an ram sanaa zan dar 6 atangin supporter-te’n zu an in tan thei a, mahse, stadium bulhnaia vantlang hmunahte erawh zu lei leh in khap a ni thung.
London 2012 Olympics leh Rio 2016-ah khan beer leh wine thlahzalen niin, hripui avanga kum 2021-a a hun sawn hlat Tokyo 2020 Games-ah thung kha chuan entu mipui an awm mumal lo bawk nen Olympic laia zu hralhchhuah khap a ni thung.
Nikum November thla khan Fifa pawhin Qatar ram World Cup tan hma ni hnih lek awm tawhah an policy thlak thutin, tournament khelhna stadium pariatah zu hralhchhuah khapna a puang.