Paris 2024 Olympics Games thlirlawkna

Paris 2024 Olympics Games thlirlawkna
Europe leh South America khawmualpui ramte football-a inelna lian pahnih Euro leh Copa America a zo a, kan hma lawkah hian khawvel infiamna lianber Olympic Games-in min hmuak leh mek a, Paris 2024 Olympics lamah kan tukverhte i han hawng zui dawn teh ang.
34th summer Olympics-ah hian ni 18 chhungin sports chi hrang 32-ah gold medal 329 semchhuah a ni dawn a, intihsiakna hi France ram khawpui ber Paris leh a chhehvela nghah tur a ni.
Olympic & Paralympic Games Tan hun
Paris 2024 Olympics hi tunthla July ni 26 aTanga August ni 11 thleng awh tur a nih laiin Summer Games kuma tel ve ziah pianphunga rualban lote inelna Paralympic Games (Paris 2024 Paralympics) chu kumin vek August ni 28 aTanga September ni 8 chhunga zawh fel tura ruahman a ni.
Games nghahna tur Paris
September 2017 daih tawh khan International Olympic Committee chuan 2024 Games thleng turin Paris a thlang fel a, chuh vetu dang awmchhun Los Angeles chuan kum li dang nghah leh rih an remtih tak vang a ni.
Paris khawpui hian Olympics vawihnih thleng tawhin, a hnuhnung zawk kum 1924 Games aTanga chhiarin kumin hi a kum 100-na chiah a ni nghe nghe.
Olympic opening ceremony
Kumin Olympic opening ceremony hi India huna July ni 26, Zirtawpni zan dar 11-a Tan tur niin, hun dangah chuan tih dan Thin pangngai angin stadium chhungah a hawnna inkhawm ropui hi nghah Thin a ni a, kumin erawh a dan a dang hle dawn a, a thlengtu France chuan an khawpuia luang tlang River Seine chungah ngei mai ‘river parade’ buatsaih turin ruahmanna an siam a, lui dung hi km ruk (mel 4) zet an zawh dawn a, Paris chhinchhiahna pui ber Eiffel Tower kawtah an tawp ang.
Seine luikam tluan hian opening ceremony chhimtu mipui 300,000 vel an intlarthla tura beisei a ni a, televesion aTangin khawvelin a thlir bawk ang.
Olympic debut nghakchhuak tur
sport-te
Paris 2024 Olympics-ah hian sport thar kan hmuh tur awmchhun chu ‘breaking’ (competitive form of breakdancing) chiah niin, Olympic sport atana an telh thar hi lam chi khat niin, New York khawpuia kum 1970 chhoa Bronx veng aTanga irhchhuak niin, hun a kal a kal a, competitive sport-ah an let chho ta a ni.
Paris-ah hian breaking inelna hi Games tawp lamah chauh kan hmu dawn a, women’s event chu August ni 9 atan dah niin, a tukah mipa inelnain an chhunzawm ang a; he sport bikah hian medal inchuhin mipa leh hmeichhia 16 ve ve, belhkhawmin mi 32 chiah an chhuak dawn nghe nghe.
Games hnuhnungber kum thum liamtaa Tokyo lama kan hmuh baseball/softball leh karate kha kumin hian paih a ni thung.
Sport climbing kalphung (format) pawh Paris atan hian tihdanglam niin, Tokyo-ah kha chuan mipa leh hmeichhe tan medal pakhat ve ve chauh dah a ni a, Paris-ah hi chuan speed climbing atan medal hran hlak siam niin, lead and bouldering-ah mipa leh hmeichhe inkawp tan medal dah a ni bawk.
Lawngkar canoe slalom huang bikah Kayak cross an tih chu telhthar ni bawkin, heat race khat zelah athlete pali an awm ang.
Sailing programme windsurfer lamah kite event pahnih iQFoil leh kiteboarding telh a ni bawk.
Artistic swimming lamah Olympic history-a a vawikhatna atan mipa inelna belh a ni a; team acrobatic routine round pawhin Olympic debut a nghakchhuak dawn.
Tarlan tak angin, Tokyo 2020-a Olympic debut nei karate chu 2024 Summer Games-a paih tura an rawt sport pali zinga pakhat niin, baseball-softball pawh an drop tih tarlan a ni tawh a, hei bik hi chu Los Angeles 2028-ah a kirleh dawn a ni.
July ni 26, Zirtawpni zanah opening ceremony Tan chauh dawn mah se intihsiak chu Paris huna July ni 24, Nilaini aTangin an Tan daih dawn a, football, rugby sevens, handball leh archery pool match-ho an khel hmasaber dawn a ni.
Shooting – mixed team air rifle-a tiThate chu medal awrh hmasaber turte niin, July ni 27, Inrinniah medal hmasaberte hi an semchhuak Tan ang a; medal dawng hnuhnungber turte chu women’s basketball lam chan niin, August ni 11-ah an dawng a, intihsiak zawh fel hnuah closing ceremony-in a zui dawn a ni.
100m final round tlan hun tur
Olympic Games-a mite ngaihven hlawh berte zinga tel kumkhua chu mipa leh hmeichhe 100m final niin, women’s 100m final bik hi an ram huna August ni 3, Inrinniah tlanin, August ni 4, Pathianniah men’s 100m final an tlan zui ve leh ang a, he intlansiak ropui pahnih hi track and field event zawng zawng dawltu tur Stade de France lama tlan tur a ni ang.
Olympic mascot
Paris 2024 atana Olympics mascot chu ‘Phryge’ an ti a, French Republic zalenna leh an history pawimawh tarlangtu a ni.
Mascot motto chu ‘Alone we go faster, but together we go further’ tih a ni a, ‘mahni chauhin kan kal chak thei zawk ngei mai a, mahse, a huhoin kan thleng thui thei zawk’ tihna lam hawi deuh a ni awm e.
Olympic prize money
Tunhma chuan Olympic Games-ah hian lawmman sum fai semchhuah a ni ngai lo a, kumin erawh a dan a dang ta a, World Athletics chu international federation zinga Olympic Games-a prize money semchhuak hmasaber an ni dawn.
World Athletics hian total prize money atan UA dollar maktaduai 2.4 (£1.9m) an dah fel tawh a, Paris summer Olympic-ah hian gold medallist-te’n US dollar 50,000 (£39,400) an dawng dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More