Paris-a Olympian upa ber leh naupang ber

Paris-a Olympian upa ber leh naupang ber
Paris Games kal meka infiammi chhuak upa ber chu Australian pitar kum 69 mi Mary Hanna niin, sakawr intlansiaka tel thin equestrian a ni.
Kum 1954-a piang Hanna tan Atlanta Games kha a Olympic debut niin, kumin Paris Games hi Olympic-a vawisarih a inlanna a ni tawh!
Heti khawpa a fei chhan sawiin, ei leh in lama a invawn uluk (strict diet) bakah intihsiak a hmachhawn loh lai pawha training a kalpui reng vang piahlamah sakawr chung chuan a thlahthlam ngai reng reng loh vang niin a sawi.
A kum 70-na piancham lawm tura thla li bak nghah ngai tawh lo Mary hi Paris Games-a inelna hmachhawn ngei ngei tura hruai erawh a ni lo a, midang an inhliam palh emaw chhan dang vanga an tel theih loh palha an ai awh tur (standby) niin, heti ang thlaveng infiammite hi AP athlete (non-competing athlete) tiin an sawi.
Dan pangngai anga intihsiak hmachhawn tura Paris thleng zinga upa ber chu Juan Antonio Jimenez Cobo niin, kum 65 mi ni tawh Spaniard pawh hi sakawr intlansiaka tel tur ‘equestrian’ tho niin, tuntum hi Olympic Games-a a inlan vawithumna tur a ni.
Swedish shooter Oscar Swann chu Summer Olympics awm tawh zawng zawnga infiammi upa ber ni ve thungin, kum 1920 Antwerp Games-ah khan kum 72 mi ni chungin Summer Olympics-ah silai a kap. Paris khuaa 1924 Olympics nghah a nih tum pawh khan kum 76 mi ni chungin a qualify leh a, mahse, Swedish putar hian Paris-ah khan inelna a hmachhawn ta lo.
Hmeichhe Olympian upa ber ve thung chu Munich khawpuiin 1972 Summer Olympics a thlen tuma team leh individual equestrian event-a chhuak kawp Great Britain pitar kum mi Lorna Johnstone kha a ni a, kum 70 leh ni nga chiaha upa ni chungin inelna a hmachhawn.
Naupang ber ve thung
Sports chi hrang 32-a inelna (event) 329 hmachhhawn tura Paris thlawklut infiammi 10,500 vel zet zinga athlete naupang ber chu Chinese skateboarder Zheng Haohao niin, kum 11 leh thla 11-a upa ni chungin July ni 26 atanga August ni 11 chhung awh tur Paris 2024 Olympic-ah hian inelna a hmachhawn dawn a ni.
Tokyo Olympic atanga hmun chang tan ve chauh skateboard inelna hi naupang lam game tih takah Paris 2024-ah pawh hian competitor naupang tak tak an ther fur a, Thai naupang kum 12 leka upa Vareeraya Sukasem leh Tokyo khawpuia bronze medal awrh Great Britain rawlthar kum 16 mi Sky Brown of Great Britain-te hmuh tur an awm.
2024 Summer Games-a infiammi upa ber leh naupang berte kum inthlauhna hi kum 50 chuang a ni.
Zheng Haohao hi tun Games-a athlete naupang ber a ni mai lo a, The Independent chanchinbuin a tarlan danin, Chinese athlete zinga Olympic Games-a tel pha naupang ber a ni tel bawk.
NBC tarlan danin, history-a Summer Olympics hmachhawn infiammi naupang ber chu Greek mipa naupang Dimitrios Loundras niin, 1896 Athens Olympics-a gymnastics bronze medal a awrh lai khan kum 10 mi lek a ni!
Hmeichhe Olympian naupang ber ve thung chu 1928 Amsterdam Olympics-a Italian gymnastics team member kum 11 mi Luigina Giavotti kha a ni thung.