Paris Olympics chief-de-mission nihna bansantu Mary Kom
Kum 2012 London Olympics bronze-medallist MC Mary Kom chu kumin July ni 26 atanga August ni 11 chhunga Paris Games-ah Indian contingent hruaitu (in-charge or chef-de-mission) atan ruat ni mah se nimin khan he mawhphurhna atang hian a inhnukdawk tih a puang.
Six-time world champion boxer Mary Kom hian a inhnuhdawh chhan chu mimal thil a nih thu leh a thutlukna siam chu pumpelh ngaihna awm lo tiin a sawi.
Indian Olympic Association (IOA) president PT Usha pawhin Mary Kom hnen atanga phatna lehkha a dawng tawh a, chu lehkhaah chuan kum 41-a upa Manipuri boxer chuan, “Engti hawi zawng pawh ni se ram tana penchhuahna leh hnathawh lam a nih tawh phawt chuan chawimawinaah ka ngai a, ka chunga tla tawh phawt chu hlenchhuak ngei turin rilru lama inbuatsaihna pawh ka kalpui thin a, mahse, he mawhphurhna hlu tak erawh mimal harsatna avangin ka phat a ngai a, pawi ka ti takzet a ni,” tiin a ziak.
IOA chuan Mary Kom hi March ni 21 khan chef-de-mission atana ruatna an tichhuak tawh a, Paris Games-ah boxer hoin Indian contingent an fehchhuah beisei a nih lain inhnuhdawh thu hriat tur a awm zui ta a ni.
Usha pawhin a lehkha awn chungchang sawichhuakin, “Olympic medal winning boxer leh IOA Athletes Commission chairperson ni bawk Mary Kom chuan mimal harsatna avangin a mawhphurhna a bansan a; a thutlukna leh a mimal nun hi kan zahsak a, rawn tur dik berawn chungin Mary Kom thlaktu tur hi ruat leh puanchhuah thuai a ni ang,” a ti.
Mary Kom hi vawi duai lo Asian champion a nih tawh bakah 2010 Asian Games-ah khan gold medal a lo awrh tawh bawk a ni.
IOA chuan six-time Winter Olympian Shiva Keshavan chu deputy chef-de-mission atan Mary Kom hrulah an ruat a, veteran table tennis player leh reigning Commonwealth Games champion Sharath Kamal chu Paris Olympic Games-a India mipa flag kengtu tur a ni.
Female flag-bearer tur erawh an la tifel lo a, Games quota la hnawhkhah loh a la awm nual avangin an la nghak rih.
Tun dinhmunah Paris Games-a inlan tur hian inelna hrang hrangah Indian athlete 40 chuang an tling tawh a; Olympic hnuhnung bera gold medal pakhat tela medal pasarih a lak aia tam Paris-ah hian India chuan a beisei mek a ni.