Parliament-ah No-trust motion sawihona nei mek

Congress leader Gaurav Gogoi chuan Lok Sabha-a no-trust motion kalpuiah sawihona hawngin Manipur thil thleng chungchanga Prime Minister Narendra Modi ‘ngawih reng’ tihtawp nana Opposition bloc INDIA te chuan no-trust motion kalpui an nih thu a sawi.
Lok Sabha-a thusawina a neihah Gogoi chuan sorkar chuan “One India sawi reng siin Manipur pahnih – a then tlangrama cheng leh a then valley a cheng a siam,” tiin a sawi a.
Lower House-a motion Gogoi an a sawi tan hian Parliamentary Affairs Minister Pralhad Joshi chuan eng vangin nge a dawn ruaiah lead speaker atanga Rahul Gandhi chu hnuhdawh a nih tia a sawi avangin Opposition leh treasury bench te inkarah inauhna a thlen a.
Hei hi chhangin Gogoi chuan Lok Sabha Speaker Om Birla chamber-a Prime Minister thusawi chu House-ah lailan ni se a tih chu Home Minister Amit Shah chuan rang taka chhangin PM chungchangah behchhen nei lo thil sawi tur a ni lo a ti zui nghal a.
Gogoi chuan Indian National Developmental, Inclusive Alliance (INDIA) parties te chuan loh theih lohin no-confidence motion kalpui lo thei lova siamin an awm tia sawiin tam leh tlem lam ni lovin Manipur tana justice awm se an duhna vang a nih thu a sawi a.
“Manipur-in justice a demand tlat a ni. Martin Luther King Jr. khan hmun tina injustice awm chu khawi hmunah pawh justice tana hlauhawm a ni a ti a. Manipur a alh a nih chuan India pum a alh tihna a ni a, Manipur a inthen hrang a nih chuan ram a inthen hrang a ni. Kan ngiat ber chu he ram leader Prime Minister Modi hi House ah lokalin Manipur chungchang a sawi tur a ni tih a ni a. Mahse, ngawih a chuh tlat a, Lok Sabha emaw Rajya Sabha-ah emaw engmah sawi a nei duh lo,” tiin a sawi a.
“He no-confidence motion hmang hian a ngawih intiam hi tihchhiat kan tum a ni,” tiin a sawi zui bawk.
Gogoi chuan Prime Minister hnenah eng vanga Manipur-a kal duh lo nge a nih ka zawt duh a ti a. Rahul Gandhi a kal a, Amit Shah leh Minister of State for Home Nityanand Rai te pawh an kal a ni, a ti bawk a.
“Eng vangin nge ni 80 chuang teh meuh PM Modi hian Manipur chungchang pawh sawi tha duh lova second 30 chauh a sawi. Chumi hnuah pawh Manipur-a remna leh muanna awm theih nan pawh ngenna a siam duh bawk lo. Minister te chuan tawngkam nei mah se, PM nihna angin a thusawi chu Minister te sawi nena tehkhin theih a ni lo,” tiin Gogoi chuan a sawi bawk.
PM Modi chuan August 10 ah Lok-Sabha ah chhanna a siam ang.