Parliament buainaah inremna awm thei mai thei

Parliament rorel hleithei lova siam chuan tawpni hmel hmu mai theiin Opposition te chuan Manipur buaina chungchanga sawihona a awm theih nan rawtna thar an nei a.
“INDIA parties te chuan rorel thei lova siam tihtawp nan ‘middle path solution’ siamin Manipur buaina sawihona theih a ni ang a, Rajya Sabha rorel pawh a pangngaiin a kal thei ang a. Modi sorkarin rawtna pawh a pawm theih kan beisei” tiin Congress leader Jairam Ramesh chuan a sawi.
Tun hnai kar hnih chhungin Lok Sabha leh Rajya Sabha te chu Opposition leh treausry bench te ngaihdan inang lo avangin rorel hlei thei lova siamin a awm tawh a.
Opposition te chuan Manipur chungchang chu Rule 267 hnuaiah business dang te dahthaa sawihona neih an ngiat a. Sorkar erawh chuan Rule 176 hnuaiah rei lo te sawihona neih a duh ve thung a ni.
Opposition te chuan tunah chuan Rule 167 hnuaiah voting provision awm theihna hnuaia sawihona neih an rawt ta nia sawi a ni a. “Sorkarin Rule 176 hnuaia sawihona neih a rawt a, kei nin Rule 267 hnuaia neih kan rawt thung a. Inremna a awm theih loh chuan a lai ve ve ah Rule 167 hnuaia sawihona neih kan rawt a ni” tiin Opposition MP te chuan an sawi a.
Opposition ten Manipur buaina chungchanga Prime Minister Narendra Modi thusawi kher an ngiat erawh an chhunzawm zel dawn em hriatchian a ni lo thung a.
Inremna a awm theih nan hian sorkar leh opposition lama floor leader te Lok Sabh leh Rajya Sabha lam ve ve a mi te pawhin inbiakna an nei tawh a. Nimin pawh khan Mallikarjun Kharge, Congress chief leh Leader of the Opposition, Rajya Sabha, Leader of the House, Rajya Sabha Piyush Goyal leh Parliamentary Affairs Minister Pralhad Joshi te pawh an inhmu tawh a ni.