Parliament Budget Session tan

Parliament Budget Session chu ruahman lawk angin Nilaini khan tan a ni a, tih dan thin angin a ni hmasa berah hian President Droupadi Murmu-i’n rorelna in pahniha member kalkhawmte hmaah thu a sawi.
Finance Minister Nirmala Sitharaman-i’n Union Budget 2026-27 chu February 1-ah a pharh dawn a, he ni hi Pathianni a ni a, thil thleng zen zen lo a ni a, ruahmanna bik siamin Pathianniah thutkhawm a ni dawn a ni.
Economic Survey pawh January 29-ah pharh a ni dawn a, hei hi kum liam ta chhunga ram sum leh pai leh eibar dinhmun tar lanna pawimawh tak a nih bakah kum thara hmachhawp leh hmasawnna tura beiseite tar lanna a ni.
Union Parliamentary Affairs Minister Kiren Rijiju-a chuan tun thla tir khan President Murmu-i’n parliament in hnih thutkhawm hi January 28 atanga April 2, 2026 inkara a koh thu a sawi a. Thawh hniha kalpui tur niin February 13, 2026 thleng thutkhawm hmasak a ni ang a. March 9, 2026-ah chhunzawm leh a ni ang.
Bidget session hi kum khat chhunga parliamentary event pawimawh ber a ni a. Rijiju-a chuan sorkar chu rorelna langtlang leh awmze nei tak a awm theih nan a inbuatsaih tih a sawi.
Thawh hniha rorel inkhawm kalpui tur hi thil pawimawh bik sawiho tur ngaihtuahna hun thawl a awm theih nana tih a ni a. Member-ten thawh khatnaa pharh budget an zir chianna hun atan te, standing committee-ten ngaihtuah ngai an ngaihtuah thar theih nana tih a ni bawk.
Tun thutkhawm hi sorkar tan pawh a pawimawh a. Eibara thanna kara hmabak ko tak tak, infrastructure, hna nei lote tana hna siam leh daih rei tur thil din kawnga hmalakna tur a ngah em em lai a ni.
Rorel khawl member zawng zawngte pawhin chhiah, sorkar sum hman leh sorkarin thil kalpui a neih a thlak danglam hrang hrangte sawiho turin an inbuatsaih nia hriat a ni.
Budget session chhung hian thutkhawm vawi 30 awm tura duan a ni.