Party chhungah harsatna lian a awm lo – ZPM leader

ZPM party chhungah harsatna lian a awm loa, an hritlang ve lik lek chauh a, damdawi ina admit ngai an awm lo tih ZPM leader Lalduhoma chuan a sawi.
Thawhtannia an party office-a inkhawmah ZPM leader chuan tunlaiin an party chu boruak chhia leh buai tak anga puanzar thin ni mah se, a dikna chu hunin a rawn hril dawn tih a sawi. “Party chhungah harsatna lian a awm loa, kan hritlang ve lik lek chauh a, damdawi inah admit ngai erawh an awm lo. He thil avanga party atanga chhuak ta hi mi tlem azawng Lunglei lamah an awm ve a, chu bak an awm lo,” a ti.
Inti tha bik leh intithianghlim bik anga an chanchin vawrhdarh a nih thu leh party dang sawrkar tawhte engmah thatna neilo leh chhe lailet dera puh anga sawi an ni thin tih a sawi a. “Hetiang hi kan party-in kan sawi ka la hre ngai lo. Party dang engmah thawhchhuah nei lo, chhe lailet der anga kan sawina chu rawn dahchhuak ngam se kan ti a ni,” a ti.
Corruption, health care chungchang leh sawrkar hnathawk hlawh chungchang leh thil dang dangah an auchhuak thin a. Mimalin an bei ngai loa, an ni erawh mimal takin na tak taka beih an ni a, tualthat ang hialin amah pawh puh a ni tih ZPM MLA hian a sawi.
“MNF leh Congress hi hun rei tak Mizoram enkawl tura ruat an lo ni tawh a, thil tha tam tak pawh an ti; mah se, hunin thil a her liampui thin a, vawiinah chuan ZPM hun a lo inherchhuak ve dawn ta niin a lang a, chutah chuan i fatu tlang ila, tiin kan zinga tel turin kan insawm mai a ni,” a ti.
ZPM chuan party dangten sawrkarna an lo siam tawh aia thaa sawrkarna siam a tum tlat a, an danglam dawn tih sawiin, a bikin corruption chungchangah fihlim an tum a, corruption rim nam minister leh MLA an awm a thiang ve dawn lo tih a sawi bawk.