Party hruaitute an ropui e…

Mizoram kaihruaitu nih inchuha intlansiakna ‘inthlan result’ a lo chhuak a, a chakin chak dan an thiam a, a chak lote pawhin chak loh dan an thiam. A chak lote pawhin phunnawina zawng lovin sawrkar thar an lawmpui thiamin elrelna tel lovin thinlung takin duhsakna an hlan takmeuh niin a hriat a; thusawi ropui tak takin a la zui zel bawk.
Tunhma deuh kha chuan, inthlan result a han chhuak a, puhmawh tur apui hi a awm chho zut mai a, inthlan result-in sawi leh sep a kai a, inthlan result kha rik luai luaiin a zui duh khawp mai. Tun hnuah erawh, inthlan result puan hnu lam boruak pawh a zangkhaiin a nuam ta hle.
Inthlana an tlin tak loh chungchangah MNF President chuan, “MNF sawrkar tlak chhan chu Pathian remruat vang zawk a ni,” tiin a sawi a. Hei hian a entir chu, tuna sawrkar thar hi Pathian remruat tih an pawm thlap tihna a ni nghal bawk a, a hahdamthlak hle a ni. Tun sawrkar thar hnuaia Assembly Session hmasa berah pawh khan, MNF Legislature party leader khan sawrkar thar hmalakna an thlawp tlat tur thu leh, thil dik lovah erawh theihtawpa Mizoram thatna tura an do tur thu a sawi a. Mizoram tan a thlamuanthlak takzet a ni.
Nimin vêk khan Congress party president pawhin party office-ah, thinlung taka sawrkar thar a lawmpui thu sawiin, “Sawrkar tha an siam chuan kan sawrkàr nen a inang reng a ni; an tan i tawngtai theuh ang u” tiin a sawi bawk a. Hei hi a awmzia chu, “Sawrkar tha siam kan duh a, kan tum a, mahse siam thei turin inthlanah kan tling ta si lova; tuna sawrkar thar hian sawrkar tha tak an rawn siam a nih chuan, keinin kan sawrkar huna kan kalpui dan tur tho a ni a, sawrkarna kan siam tluk tho a ni, a tihna tluk a ni. Thusawi ropui tak a ni.
Tunhma ang kha chu ni se, “An han sawrkar ve ta chu a ni a, an rin ang ngawt a ni lovang, an che pelh pheng phung reng mai dawn a ni…” tia vawm zui an tawh a rinawm a. mahse, hun kal tawh chu hun kal tawh a ni a, tunah chuan opposition lam pawhin sawrkar tha an duhzia chu ‘i tawngtaipui theuh ang u’ an ti thei tawh a ni.
Ram hruaituten rilru puitling tak an pu a, an kaihhruai mipuite pawhin an hnung kan zui zel hi a pawimawh dawn hle a. |awngkam feikibar hmanga social media lama inkhawh fur fur te hi bansan ila, hruaitute hniakhnung zui turin i inbuatsaih sauh sauh ang u.