Party pathumte puan hnuah BJP-in candidate la puang lo

Mizoram politics-in Dampa bial lam a hawi mek a, party pathumin an candidate tur an puang tawh. Candidate nei ngei tur BJP-in an la puang lo a, an la puang hnai rih lo a ang.
BJP hian inthlan puan an nghak a, inthlan puan hnuah Dampa bial by-election lo awm tura an party candidate tur hi an puang ang.
Mizoram BJP hian Delhi-a an party hruaitute hnenah mi pathum hming an thawn a, Delhi lam hian mi pathumte zing atang hian an lo thlang dawn tih thu dawn a ni. Chu chu an tih dan pangngai a ni a, inthlan puan hnua candidate tur puan pawh hi an tih dan pangngai a ni.
Dampa bialtu Lalrintluanga Sailo a boral avangin he bialah hian by-election neih a ngai a, danah chuan thla ruk chhungin tih a ni. Lalrintluanga Sailo hi July ni 21-a boral a ni a, chumi atanga chhut chuan inthlan nan hian hun a la thawl.
Amaherawhchu, inthlan puan hma hauhvin Dampa bial lam boruak a tang a, party pathumte chuan theihtawp an chhuah tawh.
August ni 25-ah ZPM-in an candidate tur an puang der tawh a, MNF-in September ni 3-ah an puang tawh. Congress party-in September ni 10-ah an puang ve leh bawk. Party pathumte hi chuan campaign-in Dampa bial lamah an kal tluk tluk tawh.
BJP hruaitute chuan Delhi lama an hruaitute thu an nghah thu an sawi a, mi pathum hming an thehluh thu bak han sawi tur vak an neih loh thu an sawi. Dampa bial chu an tlin theihna tura an ngaihte zinga mi a nih thu an sawi bawk.