PARTY POLITICS LEH KRISTIANNA (Party Politics & Christianity)

Zoram Thar Column:

Rev. Dr. Zaichhawna Hlawndo

‘|hattheihmiahlohna Bawm Party Politics’ tih leh ‘Party Politics leh Corruption’ tih kan ziak tawh a, tun tumah chuan ‘Party Politics leh Kristianna’ tih thupui kan bihchiang dawn a ni. Kan hriat tlan angin Zofate chu kum 1894-a Zosap missionary ten min thutchilh atangin Kristianna chuan kan nun pumpui mai chu a rawn thlak danglam tih mai tur a ni. Ziak leh chhiar tur hawrawp pawh nei nei tawh lo a kum tam tak awm tawh kha A,Aw,B te min rawn siam sak a.
Zirna hmangin khawvel tukverh min dah tir a. Hriselna lamah bung thar kaiin damdawi in te min din sak a. Eizawnna lamah pawh rahbi thar kan kai nasa. Vantlang nun dan pawh nasa taka inthlakin khawtlang rorelna pawh a inthlak danglam nasa hle. Zawlbuk chu Biak in-in a rawn thlak a, Lal leh upate rorelna pawh zawi zawiin Pastor leh Kohhran upate kutah a awm chho tiin a sawi theih awm e. A tawp a tawpah phei chuan lal leh upate rorelna zawng zawng chu thiah a lo ni ta nghe nghe. Tun tumah hian ram rorelna Party Politics leh Kristianna bik kan thlur bing dawn avangin thildang chu sawi thui lutuk lo mai ang.
Party politics hi Kristianna nen kal kawp tha tur leh kalkawp tha thei a ni reng em? Kan party politics neih leh Kristianna chu a kal kawp tha em? Party politics leh Kristianna chu engangin nge kan lo kalpui tawh? Party politics leh Kristianna hi engtinnge kan kalpui zel dawn? tih te kan ziak dawn a ni. Rilru zau tak leh inhawng takin kohhran mi, party mi leh sa leh mipuiten lo zir a, lo ngaihtuah ve turin ka ngen tak meuh che u a ni. Party politics leh Kristianna hi mipuite innghahna lungpui pawimawh lutuk a ni a, he thil pahnih hi a kal dik leh dik loh azirin mipuite hi kan kal dikin kan kal dik lo thei a. Kan ram leh hnam nun pawh a nuamin a nuam lo thei. Zofate thlarau, rilru leh taksa dam leh dam lohna bulpui ber pawh Politics leh Kristianna-ah hian a innghat tlat a ni.
Kan party politics neih leh Kristianna hi kalkawp tur a ni reng em? Lalpan ‘I pianna ramah kir tawh rawh” tia min kohna chhangin kum 2016-ah England atangin ka rawn haw a. Tlai khat chu kan kohhran tawngtai inkhawmah nu pakhat thlaraumi deuh chuan dingin thu a sawi a. “Pu Zaichhawn, politics ah te hian i inhmang ve mai mai ang e aw! Pathian mi i ni a, hetiang thil bawlhhlawhah hian inhnamhnawih ve miah suh” tiin mipui hmaah thu a sawi a. He a thusawi hi ka nupui Rohlupuii politics-a tiharhtu a ni tlat thung a, ina kan haw hnuah heti hian a sawi: “Heti tak hian Mizoram politics chu a lo tawp a nih si chuan siam that hna thawk turin Pathian mite chuan theihtawp chhuah a ngai hle a lo nih hi,” a ti. Kan party politics kalpui dan a that loh avang leh kan Kristianna leh Bible zirtirna nen a inmil loh avangin Kohhran mite chuan inhnamhnawina turah kan ngai lo a lo ni. Kohhran pulpit-a party politics sawi chu Pathian pawisawina ang tluk deuhthaw a ngaite pawh kan awm niin a lang. Chutih rual chuan politician zawng zawng deuhthaw chuan Pathian thu kan sawi a, Pathian thu hmangin politics chu kan khel leh bawk si. Kohhran member leh kohhran mite vek kha party politics-a inhnamhnawihte chu kan ni leh bawk si. Thil kalkawp lo tur leh kalkawp thei lo nia kan ngaih kha lohtheihlohvin a kal kawp mek bawk si. Kohhran member tha tak, Kohhrana Pathian thu awih tak te khan party politics-ah chuan Pathian thu an awih leh thei si lo tihna a ni. ‘Politics leh Kristianna’ chu then hran tum mah ila thil inkawp lo thei lo a ni bawk si. Chuti a nih chuan a kalkawp lohna chhan chu kan chhui chhuah a ngai ta tihna a ni.
Kan party politics neih leh Kristianna kal kawp that loh dan chu enge ni ta le? A hmasa berah chuan party politics chu lal leh thuneih inchuhna a ni. Chu lal leh thuneih inchuhna chu kan Bible chuan kan buan te, kan hmelma a tih a ni. Ephesi 6:12 ‘Kan buante hi tisa leh thisen an ni lo, lalna te thuneihna te, he khawvela thim chunga roreltu leh van hmunah thlarau sual awm te an ni zawk’ tih kan hmu. Heta lalna leh thuneihna a sawi hi Pathian atanga chhuak ni lo, Pathian tel lova lalna leh thuneihna sawina a ni. Pathian thu ang ni lo, Pathian duh dan pawh ni lo, Pathian rawn miah lova mihringin lal leh thuneih kan inchuhna, thlarau sualin mihringte hmanga ro a relna sawina a ni. Thim chunga roreltu leh van hmuna thlarau sualte’n mihring fate min awpbehna sawina a ni. Kohhran rorelnaah hruaitute, thuneitu, mawhphurtute leh mipuite min enkawltu tur kan thlang thin. Chu inthlanna chu Pathian thil, Pathian ta a ni tiin thianghlim taka kalpui kan duh thin. Engatinge ram roreltu tur kan thlanah hian chutiang chuan kan tih ve theih loh kan tih chuan a chhanna awlsam ber chu – kan party politics neih leh buaipui hi a Kristian loh vang a ni.
Party politics tuna kan neih mek hi chu mihringte indona a ni. Kristianna chu mihringte hmangaih inremna leh siamtu Pathian nena inremlehna a ni. Kohhranin kan buaipui leh party hovin kan buaipui a in ang tlat lo. Kristianna ah chuan misual chhe lailet derte pawh ngaihdamna leh khawngaihna a chhandamna kan tuipui a. Kan fel lohna leh tlinlohna zawng zawng pawh Kross tarmit hmanga min hmuh tlin tawhna a ni. Party politics chu a tha thei ang bera kan tihte pawh a chhe thei ang bera inhmuhsakna, insawiselna leh phuba lakna vek a ni tih mai tur a ni. Tunlai phei chu midangte thil tihsual sawi chhiat mai pawh duh tawk lovin kan inhal siak vel mek chu a nih hi. ‘Miin i chunga an tih a i duh tur ang bawkin mi chungah pawh ti ve rawh’ tih chu a letlingin kan hmang a, miten kan chunga an tih ve tura kan duh loh hlir hi tih kan tum ta emaw tih tur a ni. Biak inah ‘Aw hmangaihna a va mak em tih chu ka hla ni se’ tia lam dial dial te kha Biak in pawnah chuan misual chhe lailet derah kan inpuh leh bawk si. A mihring chu a pangngai vek kha kan ni a, mahse kan awmna Bawm –Party Politics bawm leh Kohhran bawm azir khan – ‘leh lama awr sen leh lehlama awr dumin’ kan awm kual vel ni berin a lang.
A tawp bera ka sawi duh chu heta tang hian khawnge kan kal zel dawn tih hi a ni? Party politics leh Kristianna hi kan duh leh mamawh, a tel lova kan awm theih loh, kan nihna leh kan awmna tur ve ve a nih tlat si chuan engtin nge inrem taka kan kal tir tak ang tih hi a ni. Tuna kan awm danah hi chuan ‘Changela sawi bel tum ang deuhvin party politics leh Kristianna chu kan suihfin thei rih lo chu a ni ber mai. Pathian thu zirmite chuan ‘Engkim chungah Pathian kan dah lal tur a ni’ tiin an sawi thin. Tuna party politics kan kalpui mekah hian Pathian thu nena inmil lo leh inrem lo te hi kan paih vek a ngai tihna a ni. Politics-ah Pathian Lal Ram a thlen a ngai a, kan party system, party kalpui dana Pathian duh loh zawng kan hnawl ngam vek a ngai dawn tihna a ni. Chuti a nih chuan tuna kan party politics bawm neih lai hi chu a thalai a awm lo tih mai tur a ni a. A bawm chawp hian halral vek a, Bawm thar hlak ‘Pathian Thlarau Thianghlim lal berna tur Bawm kan siam a ngai tihna a ni. Kan politics bawm a thianghlim hunah kan politics pawh a thianghlim ang a, politician ho pawh kan thianghlim tawh dawn a ni. Politics leh Pathian indotir tawh lovin, Politics neitu Pathian kutah kan ram leh hnam kan dah tawh zawk ang. Amah Pu Rokungan ‘Kan ram kan hnam min hruaian nang chauh kan thlang a che’ a tih kha a takin a thleng thei tawh ang.