Pathian awmpuina vangin him ti

Republican National Convention a thusawina a neihah US President hlui Donald Trump chuan kar kaltaa campaign rally neihnaa amah thah tumna chungchang sawi chhuakin beih a tawh lai pawh khan ‘Pathianin min awmpuia’ him takin ka awm a ti.
Republican presidential candidate nomination officiala pawmna a neih hnuah Trump chuan Pennsylvania rally a amah beihna chungchang sawiin, “Zaninah hian in zinga awm lo tur ka nia. He arena-a inhma ka din theihna chhan chu Pathian zahngaihna vang liau liau a ni” tiin a sawi a, a thil tawn chu mi tam tak ten ‘chunglam inrawlhna’ tia an sawi thu a sawi.
Trump chuan amah kahhlum tumtu in a hmehpuah hma second-ah immigration data screen a intarlang en tura tlema hma lama a awn thu a sawi a. “Chart en turin ding lamah tlemin ka thle a ni. Chutah tlemin ka thle nasa zual hle a, ka vannei a ni” tiin a sawi a.
“Ka lu kha thle hlek lo ila chuan min kaptu silaimu khan a tum tak a fuh chat dawn a, zanin hian in zingah ka awm hauh lovang,” tiin a sawi bawk.
Silaimu chuan Trump chu inches tlemte chauha fuh lovin a beng dinglam chunglam erawh a tai thler a, Trump hian kah a nih a inhriat veleh podium behchhanin a thuhniam nghal a ni.
Trump chuan ‘ri ring tak ka hria a, ka beng dinglam chu eng emaw in a fuh tih ka hre nghal a ni’ a ti a.
“Silaimu a ni ngei ngei ang tiin ka inhrilh” tia sawi bawkin, “Ka kut dinglama ka beng dinglam ka khawiha kan en chu thisen hlirin a lo khat a ni” tia sawiin chutah chiah chuan beih tawk a nih thu a manthiam nghal thu a sawi bawk.
“Thisen a chhuak nasa a, mahse, engtin emaw tak khan himin ka inhre tlata a chhan chu Pathianin min awmpui a ni” tiin Trump chuan a sawi zui bawk.
Trump chuan, “Kan society a inremlohna leh inthenhranna awm mek hi tihdam a ngai a ni. Rang taka kan tihdam a ngai bawk. Americans kan nih angin tum pakhat leh destiny intawm kan nei a. A huhovin kan thochhuak a nih loh chuan kan kehdarh ang” tiin Trump chuan a sawi a.
“America zahve chauh ni lo, America pum tan president ni turin ka penchhuak a, a chhan chu America zahve chauha chak chu hnehna a ni lo” tiin a sawi bawk.
Campaign neihnaah hian Ultimate Fighting CHampionship President Dana White chuan Trump chu fakin ‘real American bad ass’ a ti a. Kid Rock chuan ‘fight, fight’ tih chorus awmna hla a sa bawk a, Wrestling icon Hulk Hogan pawhin Trump chu ‘American hero’ tiin a sawi bawk.
Hogan chuan stage a a awm laiin a inchai laia a tih thin dang angin a kawr hak lai pawtthlerin a hnuaiah Trump-Vance “Make America Great Again” tih inziahna kawr a hak chu lailanin a awm a ni.
“Entertainer ka nih angin politics a inhnamhnawih ka tum ngai lo va, mahse, ka ngawi reng thei ta lo a ni” tiin Higan chuan a sawi.
Republican Convention chu Trump chhungkua inhmuhkhawmna anga tawpin stagae ah Trump family ten pungkhawmin inlanna an nei a.
Kumin presidential election campaign naah Trump fapa Eric leh Don Jr te chuan dinhmun pawimawh tak luah ve ve in Don Jr phei chu Trump a vice-presidential thlanah thuk taka inhnamhnawih anga sawi a ni.
Eric nupui Lara Trump pawh langsar tak niin Republican National Committee co-chair niin election campaign mipawimawh ber zinga a tel a.
Convention neihnaah Trump family zinga mi hriat la hlawh lo kum 17 leka upa Trump tunu Kai Trump chuan inlanna a nei bawk a, mipui hriatah a pu chu a fak a ni.
Convention tawp zanah hian Trump nupui Melanie Trump pawh inlanin podium ah a lawn chungin thusawina a nei lo va, US candidate nupui ten Convention tawp zanah thu an sawi ngai lo.
Trump fanu Ivanka leh a pasal Jared Kushner te pawh inlanin anni hi Trump an White House a luah laia adviser a a hman te niin mahse a hnuah Ivanka chuan politics a chawlhsan a ni.