Pathianniah activist Kirk-a hriat rengna hun hmang dawn

Pathianniah activist Kirk-a hriat rengna hun hmang dawn
Right-wing activist Charlie Kirk-a hriat rengna inkhawm chu Pathianni hian mi 60,000 chuang lenna, State Farm Stadium, Arizona-a neih tura ruahman a ni.
Dintu zinga a telna, Turning Point USA pawl chuan social media-ah Kirk-a ‘nun leh a hnuhma hriatpuituah’ tang turin vantlang sawmna an tichhuak.
Kum 31 mi, Kirk-a hi Nilaini khan Utah-a pawna thu a sawi laiin kah a hlum a ni a. A kaptua puh, Tyler Robinson-a chu police kuta a inpek hnuah Ningani zan khan man a ni.
Hriat rengna inkhawmah hian President Donald Trump-a bakah Vice-President JD Vance leh Secretary of State Marco Rubio-a te pawh tel tura rin a ni.
Inrinnia Israel pana a chhuah hmain Rubio-a chuan Kirk-a puala hun hmana tel tura a haw hman tur thu leh ‘thalai ropui tak’ nia a ngaih thu a sawi.
Arizona hi Kirk-a tan hmun pawimawh tak niin Turning Point USA hmunpui awmna a nih bakah a thih hmaa a nupui leh an fate pahnih nena an chenna a ni.
Kirk-a’n a thihsan, Erika-i chu a pasal thih hnua a vawi khat nan Inrinni khan inlanin a pasal hnuhma chu chhawm nung zel turin mite a chah.
Turning Point USA hmunpui atanga live-a thu a sawiah kum 36 mi, Kirk-i chuan a pasal thihnaah ‘thil tha lo titute’ chu a mawhphurtu an nih thu a sawi.
Kirk-a hi hriat a hlawh chhan zinga pakhat, Prove Me Wrong debate kaihruaia Utah Valley University-a hun a a hmang lai, US-a silai hmanga tharum thawhna leh nihna inthlak chungchanga a ngaihdan an zawhna a chhan vel laiin kah a ni.
A kaptua puh, Robinson-a hi Zirtawpni khan police-in lain Utah County Jail-a bail lova dah a ni mek a, amah leh mi dang tana hlauhawm a awm theih avangin ngun taka thlithlai a ni tih police chuan an sawi.
Tun karah hian court-ah a inlan ang a, dan a bawhchhiatna tak pawh pek a nih beisei ani.
Kirk-a hi US politics vir vela hriat hlawh leh a chungchanga mite pawh inhnialna nasa tak a ni a. Mi tam tak chuan thalaite hnenah American nihna vawn himna tura a beihna avangin an fak.
A thalaipuite zingah hriat a hlawh em avang hian Trump-a Maga tangrualah pawh a bultumtu a ni a, a vawi hnih nana White House-a a kir leh theih chhan pakhat pawh a ni.
A thih hnuah Trump-a chuan an rama civil mite chawimawina sang ber, Presidential Medal of Freedom hlan a nih tur thu a puang a, ‘a dam rualpuite zinga ropui bik leh zalenna champion-puitu’ tiin a sawi a ni.