Pathumnaah Manchester City

April 22, Thawhlehni zan khan English Premier League khelh chhunzawm a ni a. Inkhel awmchhun ah Manchester City chuan an mikhual Aston Villa chu 2-1 in an hneh a, pathumnaah an inhlangkai. Beisei angin khel tha lo mah se City hi season tawp lamah an khel tha chho a, top 3 huangah an awm leh der tawh.
Champion lai Manchester City hian an mikhual champions league khelh phak tuma tan khawh Aston Villa lakah bul an tan tha viau a, goal pawh an thun hma hle. Inkhel tan atanga minute 7-na lekah City tn hian senior player Bernardo Silva chuan hmahruaina goal thn a thun nghal. Hma takah goal an thun vangin Pep Guardiola team ten inrintawkna sang zawk an nei a. Phurna namen lo tak nen an mualah an inlan chhunzawm.
Mualneitu City lakah goal chhuah hma viau mah se Villa an buai mai lova, an si phurh an sut thuai. Minute 18-na lekah City forward Jeremy Doku chuan box chhungah Axel Disasi a ti tlu a, penalty a chawi. He penalty hi Villa in loan-a an hawh mek Marcus Rashford chuan awlsam takin a pet goa a, an si phurh a sut. Minute 18 chhungin goal hnih lut mah se goal dang a luh belh thei lawk lova, 1-1 a inhnehtawk chungin chawlhlawk an hmang phawt.
Chawlhlawk hnu lamah pawh goal lut a awm belh lawk thei lova, Etihad Stadium-ah chak zawk an awm thei lo teuh hle. Hun pangngaiah chak zawk an awm theih loh hnu, hun pek belh minute 90+4-ah Matheus Nune chuan goal pawimaw zet mai a thun a. Nunes goal thun hmanghian City in hnehna hlu tak an chang a, Nottingham Forrest lehpelin pathumnaa an luah let.
Champion lai Manchester City hian khelh 34 atangin point 61 an hmu a, pathumnaah an awm mek. City hian season kal mekah khelh hmabak pali an la nei a, top 4 huang luah chunga season khar turin inelna hautak an hmachhawn zui a la ngai dawn. City hnuai chiaha awm mek Nottingham Forrest in point 60 an hmu mek a. Panganaa awm mek Newcastle United pawhin point 59 an hmu mek bawk a. Anni bakah hian Chelsea leh Aston Villa ten top 4 huang luah phak ngei tumin tan an khawh zi zel bawk.
Manchester City laka tlawm Aston Villa hian khelh 34 atangin point 57 an hmu mek a, pasarihna an luah mek. Palinaa kir Manchester City nen pawh hian point li chauhin an la inthlau a, khelh hmabak pali an la neihah chet ‘hat ngei an tum ang.