Paula knock out tura inpeih Tyson

Kum 2005 hnu lama professional fight hmachhawn leh ngai ta lo Mike Tyson chuan November ni 15-a YouTuber Jake Paul ‘knock out’ turin a inpeih tih a sawi a, he bout atan hian a inbuatsaih tawh tih a tarlang tel.
He bout hi a tirah tak chuan July ni 20 atan dah niin, Tyson hi ulcer vangin a inenkawl leh rih a ngai a, favang tawp lam atan an sawnhla ta a ni.
He fight hi professional fight tura duan niin, mipui 80,000 lenna AT&T stadium, Texas-a nghah tur a ni.
Kum 58 mi ni tawh Tyson hian professional bout a khelh lohna rei hle tawh mah se Paula ‘knock out’ turin a inpeih tih a sawi.
Pathianni joint news conference-ah he thu hi Tyson chuan sawiin, “Harsatna chhete ka nei a, ka khuate han sik ve bawk mah se ka tha a, inhnek turin ka inpeih.
“Paula hian a tum ang tum nei ve bawk dangte nen hruihrual lo lut ve tawh mah se ka hmaah chuan rukru ang maiin a tlanchhe duai duai dawn,” tiin a tumpui tur a vau lawk!
Kum 2020 khan Tyson hian veteran ve bawk Roy Jones Jr chu ‘exhibition bout’ lamah a lo hnek tawh a, November thlaa a hmachhawn tur Paula hi chu amah aia kum 31 zeta naupang a ni.
An kawmnaah phurna petu engnge tih zawhna chhangin Tyson chuan, “Ka la inhnek theih vang hi a ni mai. He YouTuber hian fighter la dam zinga ropui ber a hmachhawn dawn,” a ti.
Kum 27 mi Paula hian a career-ah mi 10 hneh tawhin, vawikhat chiah a la tlawm.
A hmachhawn tur chungchang sawiin, “Mike hi ka hmangaihin, ka zah a, mahse, November ni 15 thleng chu thian kan ni dawn lo,” a ti ve bawk.
He fight hi round riat tur niin, round khat hi minute hnih tur a ni dawn a, 10z glove aiah 14oz glove an bun dawn a ni.