Pawikhawihna dan thar hmang tan Online-in FIR a thehluh theih dawn

Pawikhawihna lama dan bawhchhiate hremna dan thar pathum – Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) chu India ram pumah 2024 July 1 atanga hman tan a ni a. Mizoramah pawh Thawhtanni khan district headquarters tinah tlangzarh a ni.Heng dan thar pathum hian dan hmanlai tawh thenkhat a paih a, a then a kaikawp a, hmanlaia hriat ngai loh sualna thar lo chhuakte hremna a dah belh. Pawikhawihna area nilo khawi police station-ah pawh FIR thehluh theihna (Zero FIR), online hmanga police hnena FIR thehluh, sms leh thildang hmanga inkoh (summon), dan bawhchhiate hremna atan vantlang tana thil tha tih (community service) leh thildang thahnem tak dah belh a ni.
Dan thar hman turah hian mipui nawlpui tana hriat leh hman tangkai mai theih zingah, pawikhawihna thlenna huamchhung police station-ah kher FIR thehluh a ngai tawh dawn loa, online-in FIR ((e-FIR) a thehluh theih tawh dawn bawk a ni. Danin hmeichhia leh naupang a humhalhna chu heng dan tharah hian khauh zawka humhalhna dah tel a ni bawk.
Mipui nawlpuiin heng dan thar hi a chipchiara an hriat theih nan, Mizoram Police leh a kaihhnawih sawrkar department chuan hma a la mek a, a la chho zel dawn a ni.
Home minister K Sapdanga chuan heng dan thar tlangzarh inkhawm hi Serchhipah a hmanpui a. India ramin hun rei tak a lo hman tawh thlaktu tur dan pathum chu India khua leh tui leh Mizoram tan sual dona kawngah bung thar pawimawh a ni tih a sawi a. India sawrkar pian hmaa British sawrkarin dan a lo siam tawh, kum za chuanga upa dan hlui kan neihte thlakna dan tharah hian, dan hluia a tha lai paih chuang loin, tunlai thiamna hman theih turin siamrem a ni tih a sawi.
“He dan thar hian mipui mimir thlavang na takin a hauh a, police-te tha a tichak a, police-te hna nasa takin a tipung a; sual bul intan hmehmih nan sual lakah nasa takin a thikthu a tichhia a, a then laiah a thil phal viau laiin a then laiah a khauh em em a, ram leh mipui tana dan tha tak a ni dawn,” Home minister hian a ti.
He dan thar hnuaia Mizorama FIR thehluh hmasak ber chu Champhai Police Station-ah a ni a. T Lalkhawngaihi d/o Keichungnunga, Champhai Bethel Veng chuan an kudam, thirchhia leh thildang an dahkhawmna ami, dar (bronze & yellow bronze) quintal 1.5 chuang, pawisaa a hlutna Rs. 1,19,000 rukchhuah a nih thu June 30 khan Champhai Police Station-ah hian a report a, FIR hi ziakin a awm loh avangin July 1 chawhma dar 10.30 khan ziaka dah a ni a. Dan thar zing ami BNS hnuaia ziahluh niin, dan thar hman hnua thubuai ziahluh hmasa ber a ni a, a thilbo report rutute hi zawn mek an ni.

8 SP Aizawl, Champhai, Lunglei, Lawngtlai leh Saitual te chu dan bawhchhiatna lianthamah uluk taka crime scene videography ti tan turin thu pek an ni.
8 Mipui nawlpui leh police ngeite tan pawha inzirna turin heng criminal law thar atanga a pawimawh zual lawrkhawmin, Mizo tawng leh Sap tawngin video siam a ni a. Lehkhabu leh thuziak pawh siam niin hmun hrang hrangah thawn darh a ni.
8 Police Station staff leh supervisory officer zinga zaa 93 hnenah training pek a ni tawh a. Hei bakah hian kohhran, school leh tlawmngai pawl hnenah training pek thin niin, hriat theih chinah heng training-ah hian mi 1900 chuang an tel.
8 Dan thar hman chungchanga hmalakna atan hian Mizoram Police hnuaiah Committee panga – Legal Issues, Technology Upgradation, Training, Digital Investigation leh Financial Implication din a ni a. Heng Committee hian thil tul leh mamawh zirchiangin, dan thar hi hlawhtling taka hman a nih theiha atan kumin March 20 khan state sawrkarah cheng vaibelchhe 13.4 hmanna tur thehluh a ni.
8 Criminal law thar hi District leh Unit hrang hranga police-ten an hriatthiam leh an bel theihna turin Training Branch PHQ chuan Bureau of Police Research and Development, Govt. Mizoram Law College, Mizoram Forensic Science Laboratory chu a thawhpui a. Police, judicial mi leh sawrkar official-te pualin hemi thilah hian Mizoram University nen MoU ziah a ni bawk.
8 Dan thar hman tur kaihhnawihah Mizoram Police chuan Mobile Forensic Van pali lei tawhin, Aizawl, Lunglei, Champhai leh Kolasib a dah an ni. Mizoram Forensic Science Laboratory chuan tunah hian Mobile Forensic Van 10 dang lei turin hma a la mek. Heng Forensic Vehicle-a awm tura thiamna nei (trained forensic person) lirthei pakhat atan mi 4 zel la thar turin sawrkarah dilna thehluh a ni tawh.
8 BNS hian Indian Penal Code 1860 a thlak a, BNSS hian Code of Criminal Procedure 1973 thlakin, BSA hian Indian Evidence Act 1872 a thlak a ni. BNS hian Section 358 a nei a (IPC-in Section 511 a nei). Dan bawhchhiat theihna chi 20 belh niin, lung in tan theihna 33-a tihpun a ni. Vantlang hna thawh (community service) a inhrem theihna tur dan bawhchhiatna chi ruk dah belh a ni a, inhrem ngei ngei ngaihna chi 23 dah belh a ni. BNSS hnuaiah hian police-in mi an kawl theih chhung chu dan bawhchhiat azirin ni 15 atangin ni 90-a tihpun a ni a; BNSS hian Section 531 a nei (CrPC ah Section 484).