Pawl 11 science leh maths zirlaibu Mizo tawngin siam

Mizoram Board of School Education (MBSE) buatsaih pawl 11 zirlaibu pali – Physics, Chemistry, Biology leh Mathematics, Mizo tawnga ziak chu School Education minister Dr Vanlalthlana’n a tlangzarh.
Minister chuan pawl 11 zirlaite tana mahni tawng ngeia science leh mathematics subject zir theihna zirlaibu tha tak khawrpum a ni chu lawmawm a tih thu a sawi a. India rama bilingual textbook hmang hmasa ber state kan ni thei chu chhuanawm a tih thu sawiin, hemi kawnga School Education minister hmasa hmalakna fakawm a tih thu a sawi.
NEP 2020 inkaihhruaina duan chu a theihna apiangah a tam thei ang ber kalpui tum a ni, tiin, sawrkarin thawhhona (convergence) a ngaihpawimawh avangin zirna lam buaipuitute inkarah inpawhtlang taka thawhho chhawmnun zel a tul dawn a, hemi atan hian tawnhriat ngah zawk zirtirtu leh department hotute an pawimawh hle dawn tih a sawi a ni.
National Education Policy (NEP) 2020 in tawng chi hniha zirna kalpui, a bikin mathematics leh science subject-ah a ngaihpawimawh avangin MBSE chuan tawng chi hnih (Mizo leh English version) zirlaibu ‘bilingual textbooks’ siam turin kum 2022 atangin hma a la tan a. Academic session 2023- 2024 ah khan state pumah science leh mathematics bikah pawl 9 leh pawl 10-ah bilingual version textbook hman tan a ni. MBSE hnuaia zirlaite chu India rama bilingual textbook hmang hmasa ber an ni. Tunah hian pawl 12 science leh mathematics subject chu Mizo tawnga buatsaih turin buaipui mek a ni bawk.
Tuna hman mek science leh mathematics zirlaibu, high school bik tana siam bilingual textbook-ah hian MBSE chu copyright holder a ni a. English leh Mizo version chu lehkhabu pakhata dah kawp a ni. Higher secondary school tana siam bilingual textbooks, tuna tlangzarh tak hi a nih ang anga lehlin niloin, MBSE syllabus mila ziah a ni a, hemi atan hian NCERT leh publication dangte rawn an ni. Zirlaibu ziaktuten syllabus milin an irawm chhuakin Mizo tawnga a fiah theih dan tur berin an ziak a. Chapter tin hmaah zirlaiin a tum – learning outcome dah niin, zirlai khaikhawmna dah a ni bawk. Zirlaibu hi a theih chin chinah sawrzim a ni a, Mizo tawnga dah remchang mai lote chu a nih ang anga dah niin, zirlaibu tawpah a sawifiahna dah a ni thung.