Pawl chhuakte chanchin ziahna bu chu
Mizoramah hian pawl chhuak engemaw zat an lo
awm tawh a, a tam zawk fe hi chu an chanchin ziaka dah a ni lo. Pawl pahnih pathum chanchin chu chhiar tur a awm ang. Tunah chuan pawl 40 vel chanchin chhiar tur a awm dawn ta.
VL Zaikima ziah, “Zoram Pawl Chhuak Zir Chianna” tih bu chu Nilaini khan Revd Chuauthuama’n a tlangzarh a, he lehkhabu-ah hian pawl chhuak hrang hrang 40 vel chanchin a chuang a ni.
A ziaktu hian kum nga vel a ziak a, a dintute a kawm bakah an hnungzuitute a kawm bawk. Anmahni hnaihtu mi dang, khawtlang hruaitute thlengin a kawm.
Zaikima hian 1980-ah khan Vanawia pawlte chanchin a lo ziak tawh a, chumi hnuah Khuangtuaha pawlte, chumi hnuah Tlira pawlte chanchin a ziak leh. A ziak ta zel a, pawl 40 vel chanchin a khawrpum thei ta a ni.
He lehkhabu-a upa ber chu Tlira pawlte an ni a, anni hi 1914-a din niin, Mizorama pawl chhuak hmasa ber an ni. A hnuhnung ber chu Delete Kohhran an ni a, anni hi 2022-a indinah a ngai; 2010 velah bul an tan tawh a, an indin fel hi chu nikum kha a ni tih chu a thlir dan a ni.
puthmang inang an nei a, “An nationalist vek. Independent an tuipui vek,” a ti. “Ram leh hnam an buaipui a, zalenna an buaipui,” a ti a, “UNO emaw China ral lian emaw an sawi a, independence hmuh an duh a, an ring bawk a,” a ti bawk.
Zofate independent hi an tuipui a, mahse tharum thawhna lam chu an hawi lo tih a sawi. Tharum thawhna lam hi Kiauluaia’n a sawi a, ani pawh hian tharum chu a thawh chuang lo a ti.
Thu ken inang an neih pakhat dang a sawi chu, “Israel an tuipui, Israel hnam bo niin an inhria,” a ti.
Pawl chhuak chanchin a ziah hmasak ber, Vanawia pawlte chanchin a ziah dawn khan a tum ve reng pawh a ni lo a, “An chanchin kha mak deuh deuhin kan sawi luih luih a, tumah khan kan finfiah si lo a. Ka tlawmngai ta deuh a, ka tum ta rawih mai a ni,” tiin heti lam a hrut tan dan a sawi.
Sangau-ah Vanawia leh a pawlte kal chilhin a riah chilh a, an chanchin a ziak ta a ni. Pawl dang a hrut zel a, “|hangtharte’n an hriat atan, an chhiar atan hetia ziaka lo dah hi tul ka ti a ni,” tiin a hrut tak zel chhan a sawi.