Pawl inrelbawlnaah dan bu a lal ber a, zah tur – ZPM working president

Pawl inrelbawlnaah chuan dan bu a lal ber a, kan zah bawk tur a ni tih ZPM working president chuan sawiin, an party chuan a lu ber atanga a hnuai ber thlengin inkaihhruaina tha tak an nei tih a sawi.
ZPM Zonu Gen. Hqrs buatsaih “Project 50” khuhhawn leh political training neih a hmanpuinaah K Sapdanga chuan pawl inrelbawlna chungchang a sawi a. Pawlin a mamawh ber chu inkaihhruaina tha a ni, tini, an pawlin a lu ber atanga a hnuai ber thlengin inkaihhruaina tha tak an nei tih a sawi.
Pawl chhungah harsatna a thlen emaw an ngaihdan anga thil a awm lo emaw a nih chuan an dan bu keu thuai thin tura chahin, “Pawl inrelbawlnaah chuan dan bu hi a lal ber a, kan zah bawk tur a ni. Kan hotute nena kan thawhhonaah pawh kan hruaitute thu hi ngaihpawimawh tur a ni a, pawlin hma a sawn leh sawn lohah president hian mawhphurhna a nei sang hle. Thurawn kan inpe tawn thin tur a ni a, pawl tana kan mamawhte mahnia bawhzui mai loin, hruaitu lu ber te nen tha taka sawi hi a him ber,” a ti.
Inthlan neih turah an party chu April khan an intifel thawkhat a, bial hrang hrangah candidate-ten tlin ngei tumin theihtawpin an bei mek tih ZPM working president hian a sawi. Mipuiin inthlan an chak tawh hle a, kalphung thar sawrkar hmel an duh tawh tih a sawi.
“Kuthnathawktuten dinchhuah hlan an nghakhlel a, sawrkar hnathawkte hlei hlei hian a hun taka hlawh pe thei tur sawrkar thar an mamawh tawh. Politics hian khawtlang leh kohhran rawngbawlna thlenga a nghawng avangin kan ram dinhmun siamtha tur hian hei aia ngaihtuahna hmang thei tur kalphung thar hi kan mamawh a. Thangtharten inthlan an nghakhlel a, an hmakhua an ngaihtuahin leh ram dinhmun an thlirin sawrkar thar hrawn an nghakhlel tawh a ni,” a ti. Chu’ng zawng zawng khaikhawmtu chu nute an ni, tiin, nuten kan ram siamtha turin dinhmun pawimawh tak an chelh tih a sawi a ni.