Pawngsual thubuaia thiam loh chang NCT member thin Taeil kum thum jail tang dawn

Pawngsual thubuaia thiam loh chang NCT member thin Taeil kum thum jail tang dawn
South Korean singer Taeil (a lai-ah hming Moon Tae-il), kum 31, chu 2024-a South Korea tlawha zin Chinese hmeichhe pakhat a pawngsual avangin Seoul Central District Court chuan kum thum leh a chanve jail tang turin a chungthu a rel.
Taeil hian Chinese hmeichhia zu rui chatthla mipat hmeichhiatna a lo hmanpui, hei hi quasi-rape an ti a. An rui chatthla emaw, nikhawhreloa an awm lai emaw, tildang eng emaw avanga hnial thei dinhmuna an din loh laia an duh ve reng vang ni lo a mipat hmeichhiatna lo hmanpui hi South Korea danah pawngsual a ni.
Taeil leh midang pahnih chuan June thla khan he quasi-rape a puhnaah hian an thiam lo tih inpawmin, court chu an chunga zahngaihna lantir a hremna tihnep deuh an beisei a. Korea Herald-in a tarlan danin heng mipa pathum te hi man an nih hnuah darkar 40 chhung sexual violence treatment program nei tura tih an ni a, sorkar ukil lam chuan kum sarih tal jail tan tir tura an nawr laiin court chuan an vawi khat tihsualna a nih avangin kum thum leh a chanve-ah an jail tan tur a pawh tawi sak ta a ni.
Nikum August thla khan NCT enkawltu SM Entertainment chuan Taeil hi zahmawh rawngkai pawikawihnaa inhnamhnawihna nei ni a a lan avangin NCT atanga chawlhtir a nih thu an lo puang tawh bawk a ni.
Taeil baka midang pahnih te hi Lee leh Hong tih bakin an hming tarlan a ni lo va, an pathum hian June 2024 khan Itaewon, Seoul-ah Chinese hmeichhe khualzin nen hian intawngin, an paliin zu an inho a, Chinese hmeichhia a rui ta hle a, taxi lain hmeichhia hi Lee-a chennaah an hruai haw a, chutah chuan an pathumin, a hrang theuhin mipat hmeichhiatna an hmanpui ta a ni.