Peace Accord vanga kan neihhi min chhuhsak ngawt thei lo

• Zoramthanga

India nen Peace Accord an siam avanga Mizoram-in hamthatna a neih hrang hrang chu India sawrkar leh Parliament pawhin a chhuhsak ngawt theih a ni ve lo tih MNF hruaitu Zoramthanga chuan a sawi.
MNF party hian June 30 – Remna Ni champha kha Mizoram hmun hrang hrangah an hmang a. Saituala hmanpuitu MNF president Zoramthanga chuan 1986 June 30-a inremna kha thenkhatin ‘India leh MNF inremna’ tiin sawi mah se, a ni lo tih a sawi. “Mizoram leh India inremna a ni a, indonaa tel ve lo aiawhin Pu Lalkhama’n a sign a, MNF zawng zawng aiawhin Pu Laldenga’n a sign a, India aiawhin an sign bawk. India aiawhin MNF aiawhin Mizo mipui aiawhin he remna hi sign a ni,” a ti.
India leh ramhnuai sawrkar chhiat vanglai takin inremna siam ni ta se, an tlupherh rang hle dawn a. An chak vanglai tak ve ve in remna an ziak tih sawiin, “Keini ramhnuai sawrkar pawh economic leh thildanga kan chak vanglai tak a ni a, sawrkar chak lo tan inremna kha sign ngawt chi a ni lo. Khatilai taka kha Remruattu maka chuan min nghahtir char char a lo ni. Mizoram UT chu state-ah hlankai a ni a, Article 371G chu special provision a ni nghal bawk. He article hi kan hnam dan, thubuai hlabuaiah India danin a tibuai ve thei lo,” a ti.
Ram neitu nihna leh a behbawmah India Parliament-in thuneihna a nei loa, Mizoram mipui chiahin kan nei thei tih MNF president hian a sawi a. He special protection hi India ramah Nagaland nen chiah kan nei a, Nagaland erawh kum 1962-ah khawngaih leh duhsak vanga a peka an pek niin, chhuhsak se a zo der dawn tih a sawi.
“Keini chu article 371G hi a leia kan lei thlap a ni a, chhuhsak ngawt theih kan ni lo. Min laksak dawn chuan kan pek tawh silai chi hrang hrang leh kan thisen man kha min pek let ve leh a ngai. He Peace Accord hi Zoram mipui zawng zawngin kum 20 chhung kan tawrhna avanga min pek a ni a. Min chhuhsak ve ngawt thei lo,” a ti.