Pensioner-te sum lak tur tichingpen thu-ah Brazil minister bâng

Pensioner-te sum lak tur tichingpen thu-ah Brazil minister bâng
Brazilian Social Security Minister Carlos Lupi chu ni kua kal taa police-in pensioner-te sum dawn tur $ tluklehdingawn 1.1 ei rukna lian tak an hai chhuah hnuah a bâng.
Police chuan kum 10 chuang liam tawh atang khan National Social Security Institute (INSS) chuan anmahni thuin pensioner maktaduai telte hnena sum pek tur chu an lo titlem ve ngawt niin an sawi a ni.
Sumte hi pawl (association leh union) hrang hrang hnenah pek niin chu sorkar hnathawk ei rute nen an insem leh thin niin an hria a ni.
Lupi-a hian engmah thil dik lo tih a neih loh thu leh hetiang a awm tih sawi a hriat veleh a chhuitir nghal tih a sawi.
“Chhui hna thawh mekah hian engmah inrawlhna ka nei lo a ni tih a chian theih nan hetiang thutlukna hi ka siam a ni,” tiin Lupi-a hian a bân chhan hi X-ah a tar lang.
“Chhuinaah hian tih dan pangngai vekin, a mawhphurtute hai chhuaka an hrem ngei ka beisei a, an dinhmun hmachhuana mi tam tak tinatur hi na taka an hrem ka beisei,” a ti bawk.
Operation No Discount (Portuguese-a Sem Desconto)-ah hian police chuan Brazil puma agent 700 hnenah mi dap phalna 211 pel chhuah tawh a ni tih an sawi.
Thil $ maktaduai 177 man hu an hreng a, heng zingah car changkang, tlereuh leh pawisa fai $2,00,000 chuang a tel.
He sum tihchingpennaah hian pension tawh pawla telte pawh anmahni rawn hmasa lem lovin an hming teltir an nia hriat a ni a, pawl member an nih avangin heng mite hi an hamthatna dawn eng emaw zat laksak an ni.
Police chuan sum tihchingpen kalpuinaah hian an rama rethei deuh lai bitum a ni a, hei hi pensioner-ten an hriat chhuah mai loh nan leh complain pawh an thehluh mai loh nana an tih niin an ngai tih an sawi.
Kar hmasa khan INSS hotupa ber chu a lo bâng tawh a, sorkar hnathawk paruk chu bân an ni bawk tih police chuan an sawi.
Chhuitute hian kum 2019 leh 2024 inkara real tluklehdingawn 6 chuang pawhpen chu an chhui ber a, a tak takah erawh chuan dik lo taka sum vir kualtir hi hei aia tam, a zat an la hriat theih loh a nih an ring.
INSS Budgets & Finance Director of Débora Floriano-i chuan task force an din ang a, pawisa bote hi hmuh let an tum dawn tih a sawi a; mahse, tunah rih chuan engzata tam nge tih hriat an tum phawt dawn tih a sawi.
Lupi-a hi President Luiz Inacio Lula da Silva-a sorkara ei rukna kaihhnawih avanga thla khat pawh tling lo chhunga minister bâng pahnihna a ni.
April thla tir khan Communications Minister Juscelino Filho chu kum 2022-ah thamna a la nia puh a nih avangin a bâng.
Lula ngei pawh hi kum 2018-19 inkar khan ei ruk vangin kum khat leh a chanve a tang a; mahse, thiam loh a channa hi hnawlsak leh niin inthlan a chuh a, a vawi thum nan president a ni leh ta a ni.