Performance Grading Index 2.0 leh Mizoram
H&TE leh School Education Minister Dr. Vanlalthlana chuan nimina Aizawl City College Joint Students’ Union (ACCJSU) kum 25 tlin lawmna a hmanpuinaah, Ministry of Education-in Performance Grading Index 2.0 report a tlangzarhah Mizoram chu a tichhe berte zingah kan tel tih a sawi a.
A chhe lam bawk chu!
PG Index—2.0-ah hian kum 2022-23 leh 2023-24 chhunga State hrang hrang 36 (UT nen) score dinhmun pholan a ni a. Hetah hian kum 2022-23 chhunga score hniam zual pali te chu Mizoram (471), Nagaland (446), Arunachal (439) leh Meghalaya 401.6 te an ni. Mizoram aia score hmu hniam pathum an awm.
Tichuan, 2023-24 score kan en leh chuan, Mizoram chu a thang zawnga kal lovin a tlahniam zawngin a kal a, kum hmasa lama bottom 4 zinga state pathumte erawh a sang zawngin an kal vek thung a, Nagaland chuan min lehpel bawk.
Tunhma khan Nagaland hi HIV/AIDS hluarna ber a ni thin a, kan lehpel a, a ber kan hauh ta thung a. HIV/AIDS lama kan san tak em avanga Nagaland kha lehpel kan ni hran lova, hma an sawn avanga an tlakhniam tak em avangin keini kha an chunga awm ta kan ni ber awm e.
Heng dinhmun duhawm lo tak kan luah chungchang sawi te, tarlan fo te hi thil nuam a ni lo va, thil chakawm tak a ni ngai lo bawk; mahse, kan nihna dik tak kan hriat loh chuan, a phawvuaka dinhmun sang taka anga inngaihna hian hriat loh hlanin min hnuk hniam zel ang tih a hlauhawm zawk a ni.
Hetia han ngaih mai chuan, thil dangah ‘tha ber’ emaw ‘tha ber pawl’ nihna hi kan hauh ve fo tho mai. Eng eng emaw criteria hmanga fai ber nihna te, thianghlim leh ti tha ber nihna te hi kan nei ve fo tho. Education minister-in a sawi, National Institutional Ranking Framework (NIRF) ranking-ah Mizoram University leh Pachhunga University College-te thleng sang mah se, school education lama kan dinhmun hian PGI lamah min hnuk hniam a. Chumi awmzia chu, a bulthut lam, a grassroot level lam kan hniam zel chuan a chung lam pawh a nghawng zel dawn tih a chiang a ni.
He’ng thil duhawm lo tarlan thin hi, mahni mawng hlimnaa ngai liam mai lovin, tan lak a tulzia hriat nawn nan hmang thin zawk ila a duhawm hle a ni.