Phaitual School Games Taekwondo-ah Mizoramin gold medal la ve ta nge nge

November ni 8-12, 2024 chhunga Vidhisa, Madhya Pradesh-a khelh zawh tak 68th National School Games (Taekwondo)-ah Lalruatkima chuan Under 51kg category-ah gold medal a hlawhchhuak a, tun hi National School Games khelh tawh chinah Mizoramin taekwondo atanga gold medal a lakna hmasaber a ni.
Govt. Venglai H/S, Lunglei Venglaia zirlai naupang Ruatkima hian gold medal la turin a match hmasaberah Himachal Pradesh aiawh chu 14-1 14-2-in a hneh phawt a; a dawtah 14-1, 15-2-a Karnataka player sawp zui lehin, quarter final-ah KVS (Punjab) aiawh chu 6-6(1-0), 8-0-in a hneh a; semi-final lamah erawh Uttar Pradesh player lakah a talbuai phat a, 1st round-ah 1-5-a game a hloh hnu 2nd round-ah insiamthain, 12-6-a game a lak hnu final round-ah erawh 8-2 hneh awlsam nen final a lut zui ta nge nge a ni.
Final-ah hian champion lai Meitei mi nen ngei mai intumin, 8-3, 5-2 hnehna nen gold medal a hlawhchhuak ta a ni.
Lawngtlai vengpui rawlthar Lalruatkima hi Lawngtlai atanga taekwondo zir tan niin, tunah hian SAI Extension Center, Lungleia zir mek a ni.
Ruatkima hlawhtlinnaah MSSC, Mizoram Amateur Taekwondo Association leh School Education Department lamin lawmpuina an thawn nghal a, Mizoram an lo thlen hunah lawmna hun hmanpui an tum bawk.
School Games (Under 17)-ah hian Mizoram atangin player pathum an chhuak a, pakhatin gold a la a; Mizoram team hi Albert Lalrinfela’n a hruai.