Phaituala gold medal hnekchhuaktu Sawmi leh Bulhringpachha

Phaituala gold medal hnekchhuaktu
Sawmi leh Bulhringpachha
Nimin khan Rohtak, Haryana-a REC Combined National Talent Hunt Boxing Programme 2024-25 final kg 48-50 (junior) huangah Serchhip boxer TC Malsawmkimi chuan a thlengtu Haryana boxer Kashish Malik hnehin gold medal a awrh a, ti hian, kumin chhungin national level-ah Sawmi hian gold pahnih a la tling.
Siaha Boxer J. Joseph Bulhringpachha pawhin 52-54 kgs weight category-ah Uttar Pradesh boxer Aryan hnehin gold medal a hnekchhuak bawk.
REC Combined National Talent Hunt Boxing Programme 2024-25 hi October ni 15 atang khan khelh tan niin, he programme-a Mizo boxer pali chhuak zingah Julie Ngurthansangi (East Lungdar) leh Esther Lallawmsangi (Reiek) erawh a vanduaiah an tang a, medal an rawn hawn ve ta rih lo.
Kum khat chhunga national level gold medal pahnih hawn thei Malsawmkimi hian kum 2024 April thla khan Serchhip District Boxing Association (SEDBA) sponsor-in Haryana, Rohtak hmunah vek hian REC Combined National level Talent Hunt Programme 2023-2024 final-ah a khingpui Uttarakhan boxer hnehin gold medal a lo hlawhchhuak tawh a; hemi tuma a haw hi North Vanlaiphai khawtlangin an khaw dai atangin lirthei chi hrang hrang nen an lo hmuak a, a pualin bazar-ah amah lawmpuina leh chawimawina inkhawm an lo huaihawt tawh nghe nghe a ni.
Hemi hnu hian India rama hmeichhe boxing zirna tha bera ngaih Guwahati-a National Center of Excellent (NCOE)-ah awm tura sawmna a dawng nghal a, kumin May thla atang khan NEOC-ah hian lut tanin, chuta tang chuan national level-a a boxing zinkawng a zawh chho zel a ni.
Siaha boxer chhuanvaw Bulhringpachha pawh hi kumin April thlaa Rohtak, Haryana hmuna REC Combined National level Talent Hunt Programme 2023-2024 nghah a nih tum pawh khan tel tawhin, final-ah a vanduai ta hlauh a; tun tumah erawh hnehna ropui tak nen a rawn comeback a; final-ah Uttar Pradesh boxer Aryan hnehin gold medal a hlawhchhuak ve ta nge nge a ni.