Phaitualah Sanga leh Rempuii an lian leh

Phaitualah Sanga leh Rempuii an lian leh
Durtlang rawlthar C. Lalramsanga s/o C. Lungmuanpuia chu a kawppui nen nimina khelh zawh tak Yonex-Sunrise 31st Smt Krishna Khaitan All India Junior (U-19) Ranking Badminton Tournament mixed doubles category-ah an champion leh a; Serchhip tleirawl Lalrempuii d/o Albert Lalrosanga (L) pawhin Girl’s doubles category lamah bronze medal a dawng ve bawk.
Mizo pahnih lansarhna tournanemt hi India rampum huapa badminton inelna ngaihhlut hlawh leh ropui ber pawl niin, tun September 12-19, 2024 chhung khan Panchkula, Haryana-ah nghah a ni.
Mission Veng Badminton Club player Ramsanga hi Vishakha Toppo nen an inkawp a, final-ah seeded number one pair Mithilesh P. Krishnan leh Manya Ralhan an hneh.
Kumina Mizoram badminton tana record thar hraw pui pui la chho mek Sanga hian history thar siama Mizo badminton player zinga India ram pum huap inelna under-19 category champion hmasa ber a nihna kawngah Toppo nen seeded no 6 ni chungin inelna an hmachhawn.
Round of 32-ah Divyansh Agarwal leh Laya Ajith Kumar-te tangdun chu 21-11, 21-17-in an hneh phawt a; round of 16-ah Mizo player Sainunmawia Sailo leh Ishita Negi inkawp lakah 21-10, 21-17 hnehna chang lehin quarter-final an lut.
Last eight-ah hian Anjen Chris Baptist leh Anvitha Vijay-te inkawp chu deciding game-ah 11-21, 21-18, 21-18-in an hneh a; semi-final stage-ah pawh harsatna lian tham tawk loin Divyansh Rawat leh Zenith Abbigail tangdun lakah 21-19, 21-12 hnehna an sualchhuak leh bawk.
Final-ah hian tun tournament-a seeded no 1 pair Krishnan leh Ralhan tangdun laka 21-18, 21-14 hnehna changin India champion thar an ni.
Ralte Villa Badminton Club player Rempuii hi Tanoo Chandra nen an inkawp a; qualifying round atanga khel tanin, an kalkawngah tournament-a seeded sang ho an vaw thla nual a, semi-final-ah 21-18, 21-18-in seeded no 1 Pragati Parida leh Vishakha Toppo tangdun an ngam lo.
Serchhip tleirawl Lalrempuii pawh Tanoo Chandra nen inkawpin, U-19 Girl’s Doubles category-ah semi-final an thleng bawk.
Anni pahnih hian qualifying round atangin inelna an hmachhawn a; main draw an invuak tlin hnuin round of 32-ah seeded no 3 Deepak Rai Aditi leh Ponnamma BV Vriddhi-te chu 21-15, 21-12-in awlsam takin an hneh.
Round of 16-ah pawh Samridhi Bhardwaj leh Saanvi Nautiyal inkawp chu awlsam takin 21-9, 21-12-in an paltlang leh bawk.
Quater-final lamah seeded no 8 Maheshwari G. leh Brinda Shinde-te inkawp chu straight set bawk 21-5, 21-11-in an hneh leh a ni.
Semi-final match-ah erawh seeded no 1 pair an hmachhawn zui ta tlat a, Pragati Parida leh Vishakha Toppo tangdun lakah 21-18, 21-18-in an vanduai a, bronze medal an dawng.
Boys & Girls under 19 years age group tana buatsaih he tournament hi Haryana Badminton Association-in a thleng a; Boys Singles, Girls Singles, Boys Doubles, Girls Doubles leh Mixed Doubles hmanga inelna buatsaih niin, Badminton Association of India chuan prize money atan cheng nuai li a dah a; mixed doubles champion tana Rs. 41,000 dah chu Ramsangate chan tur niin, Rempuiite’n semi-final thlen manah Rs. 15,000 an dawng ve bawk.
Tarlan tawh thin angin, Ramsanga hi tunhnaiah a chetha hle a, Kotak India Junior International Series 2024 leh Yonex-Sunrise India Junior International Grand Prix 2024-ah bronze medal pathum a dawng.
NE Zone Inter-state Badminton Championship 2024lamah pawh khan U-19 Mizoram Boy’s team champion-puiin, Mizoram Men’s team chu final a luhpui bawk.
Mizoram Badminton Association chuan thuchhuah siamin, Mizoram tihmingthatu Ramsanga leh Rempuiite a chhuangin, lawmpuina leh duhsakna sang ber a hlan a, Mizoram badminton-a chanchinthar ziaktu nih chhunzawm zel turin duhsakna a hlan nghal bawk.